La Col.lá Propinde entama la so temporada de conciertos y presenta videu

El próximu xueves 5 d'abril, el grupu l.lenizu de folk-fusión La Col.lá Propinde va entamar la so xira de conciertos "Güeria 07". Ello va ser nel llagar Tierrastur de Cualloto (Uviéu). La banda va aprovechar l'actuación pa presentar el videu "Llandellena", que se grabó n'Asturies ente los meses d'avientu a marzu baxo la dirección de Delfo Valdés.

La xira "Güeria 07" va llevar al grupu a la XIII edición de la multicultural "Feria Internacional de los Pueblos" de Fuengirola (Málaga), y tamién a escenarios asturianos, con feches yá confirmaes na "Nueche Folk de Cué" (Llanes) el 26 de Mayu, y na "Fiesta de la Escanda" de Xomezana (L.lena) el 25 d'Agostu.

Tocante al vídeu de "Llandellena" el grupu preséntalu como un trabayu en clave de humor que cuenta les esperiencies d'un asturianu emigráu a l'Arxentina na so vuelta al pueblu uvieín onde nació dempués de munchos años d'ausencia. L'argumentu de la cinta parte de la narración d'un vecín d'esti pueblu que'l propiu grupu pudo recoyer ellí, y con ello'l grupu quier sorrayar la importancia y repercusión del tema de la emigración "forzada por una realidá social, política, económica o cultural que se-yos impón a los emigrantes".