La coleición ‘Llibrería Llingüística’ de l’ALLA anova’l diseñu y el formatu nel númberu nuevu sobre la fala de Somiedo

‘El sistema temporal en asturianoleonés: el habla de Somiedu’, del alemán Helmut Brammerts, ye’l númberu 31 de la coleición ‘Llibrería Llingüística’ de l’Academia de la Llingua Asturiana (ALLA). Cola espublización d’esti títulu la institución aprovechó p’anovar el diseñu y el formatu cola fin de facer estos llibros más amañosos pa los llectores.

El filólogu alemán fai nesti trabayu “una aportación a la filoloxía asturiana seique más valiosa por ser un trabayu escritu en 1969, espeyando l'estáu de la llingua d'hai güei más de mediu sieglu y analizando fondamente los precedentes científicos de la dómina”. Nuna primer parte Brammerts realiza un informe críticu sobre l'usu de los tiempos verbales n'asturianu a traviés de los estudios dialeutales del momentu, pa depués adiéntrase y estudiar el sistema temporal de la fala de Somiedo valiéndose de les grabaciones magnetofóniques que fixo en dellos llugares del conceyu nel añu 1965.

A lo cabero del llibru, l’autor amiesta la trescripción de dalgunes d’elles. Éstes tán reproducíes facsimilarmente nesta edición, como amuesa de testos dialeutales d’esta zona del occidente d’Asturies.

Nacíu nel 1939 en Mechernich y especialista nel área del deprendimientu y la enseñanza de llingües, Brammerts trabayó nel ámbitu de les llingües romániques, la llingüística y la didáutica de la enseñanza d'idiomes dende’l 1969, cuando entró como investigador na Ruhr-Universität Bochum, hasta la so xubilación nel 2004. En concretó, especializóse nes estayes del deprendimientu autónomu d'idiomes en tándem y del asesoramientu del deprendimientu, rescamplando’l so trabayu y investigación al traviés del Programa Tándem ente la Universidá d'Uviéu y la institución alemana.

Con esti títulu l’ALLA aprovechó p’anovar el diseñu y el formatu de la coleición ‘Llibrería Llingüística’ “cola fin de facer d'estos llibros ferramientes calidables y fáciles de remanar pa llectores ya investigadores”.