La ciudadanía va reclamar la oficialidá'l sábadu con motivu del Día de les Lletres

La Xunta pola Oficialidá de la Llingua Asturiana (XDLA) lleva convocando esta manifestación dende l'añu 1987.

La reclamación d'oficialidá pal asturianu y el gallego-asturiano va tomar el centru d'Uviéu una vez más coincidiendo cola celebración del Día de les Lletres Asturianes. Como asocedió nos años anteriores, la XDLA tresllada la marcha al sábadu pela mañana pa facilitar l'asistencia.

Asina, convoca a tola ciudadanía al meudía na Estación del Norte (RENFE) pa percorrer la cai Uría hasta la Escandalera. Ehí Letisia Baselgas y Pau Santiso van encargase de lleer el manifiestu preparáu pola organización a tolos asistentes.

Depués, si'l tiempu lo permite –la predicción actual de l'Axencia Estatal de Meteoroloxía (Aemet) nun da agua a la hora de la marcha–, van poner la so música Ún de Grao, Fruela 757 y Alicia Álvarez. Actuaciones que van poner el ramu a una xornada na que la XDLA va reclamar a la clase dirixente "valentía y responsabilidá política pal reconocimientu de la oficialidá: pa ponenos al altor de les demás comunidaes con llingües propies diferentes del castellanu".