La ciudadanía nun baxa la intensidá na so demanda d’oficialidá

Dellos centenares de persones acudieron a la llamada de la Xunta pola Defensa de la Llingua Asturiana (XDLA) pa concentrase'l xueves na Xunta Xeneral pa reclamar la oficialidá nun momentu delicáu de la negociación de la reforma estatutaria. “Venimos a dici-yos a les puertes qu’esta oportunidá tien que ser la definitiva”, afirmaron los organizadores.

A la hora marcada pa la concentración arrancó l’aición prevista. Manifestantes, munchos portando la bandera de la oficialidá con corazón multicolor, arrancaron dende Presidencia y baxaron per Marqués de Santa Cruz pa dar tola vuelta a la Xunta Xeneral.

Glayíos de “oficialidá” acompañaben a los presentes, que consiguieron facer una enorme ‘O’ al arrodiar tol edificiu. Mentanto, militantes de la XDLA preparaba frente a la entrada de Presidencia l’equipu de soníu pa la llectura del manifiestu.

Nel momentu nel que María Xosé Martínez, presidenta del coleutivu, garró'l micrófonu la cadena humana dexó’l so circuitu circular y paró pa sentir les sos pallabres, momentu nel que se pudo ver la importante asistencia al actu magar la premura de la convocatoria. “Otra vez los corazones multicolores vuelven a ondiar n’Uviéu. Otra vez los falantes de les llingües propies d’Asturies tienen que salir a la cai a dicir que yá ta bien, que tenemos unos derechos y que se tienen que reconocer”, principió.

“Esta concentración ye una llamada d’atención a los nuestros representantes políticos. Venimos a dici-yos a les puertes de la Xunta Xeneral qu’esta oportunidá tien que ser la definitiva. Nun aceptamos nengún plazu pa resolver esti asuntu que nun seya’l fin de la llexislatura”, avisó la XDLA, que demanda a la FSA que lleve al Parllamentu’l “debate de la reforma estatutaria y de la redacción del artículu cuartu”. Que lleve al Plenu “un proyectu pa que tolos grupos parllamentarios se pronuncien”.

“Tamién venimos a dici-yos”, en referencia a Foro, “que nun tamos d’alcuerdu n’introducir nel debate asuntos que nada tienen que ver colos derechos llingüísticos como contrapartida pa votar a favor. O se ta pol reconocimientu de derechos o se ta pola limitación de derechos”, aseguraron. Pa finar, la XDLA avisó de que va siguir saliendo a la cai “güei y les veces que faiga falta” y reclamó a los partíos que “tean a l’altura”.

Na semeya, Martínez llee'l manifiestu frente a los manifestantes.