La ciudadanía sal a la cai pa reclamar la oficialidá del asturianu

Baxo’l lema ‘L’asturianu, llingua oficial’, la ciudadanía torna a salir esti vienres a la cai pa reclamar un puestu principal pal idioma na sociedá. La XDLA convoca esta manifestación, que va salir a les 19.30 hores de la uviedina Estación del Norte.

“El Gobiernu, la RTPA, la Universidá d’Uviéu y los organismos que dominen la sociedá faen de menos y marxinen a toa persona que quiera vivir n’asturianu y faen tolo posible pa dexar de llau tou avance nel usu normal de la nuestra llingua. Ye ésta una de les razones básiques poles que ye necesario salir de casa a manifestase y glayar delantre de quien faga falta pa nun permitir que se traten como inferiores la cultura y la personalidá colectiva d’Asturies”, señalen dende la Xunta pola Defensa de la Llingua Asturiana (XDLA). El coleutivu cívicu llama a tola ciudadanía a sofitar la oficialidá del idioma y a acudir a la manifestación pa reclamar con fuercia “el puestu que tien que tener la nuestra llingua na sociedá, que nun pue ser un puestu secundariu, sinón principal”.

La convocatoria d’esta tarde tien el sofitu de Compromisu por Asturies, Andecha Astur, Conceyu Abiertu, Izquierda Asturiana (IAS), Izquierda Anticapitalista, Izquierda Xunida, Corriente Sindical d’Izquierda (CSI) y del Sindicatu Unitariu Autónomu de Trabayadores de la Enseñanza d'Asturies (SUATEA). Tamién d’Iniciativa pol Asturianu, coleutivu que va poner a la venta, coincidiendo col Día de les Lletres Asturianes, paragües col lema ‘Nun te mueyas col agua… Muéyate pol asturianu’ a un preciu de 10 euros –8 pa socios–. Si nun hai sorpresa, a diferencia d’años anteriores, estos oxetos nun van ser necesarios pa la manifestación, yá que’l parte de l’Axencia Estatal de Meteoroloxía da un cero por cien de probabilidá de lluvia n’Uviéu mientres tol día.