La cigua persigue a Alonso n’Inglaterra

La cigua que Fernando Alonso dexare aparcada nel premiu de Francia anda otra vuelta abeyando alredor del pilotu asturianu. El motor del Renault que conduz Fernando Alonso averióse nos entrenos llibres d'esta mañana, obligando a los mecánicos de la casa francesa a poner otru propulsor nuevu nel coche del asturianu. Esta sustitución ta castigada pol reglamentu de la competición, qu'obliga a correr tol fin de selmana col mesmu motor y castiga al pilotu que ponga motor nuevu en coche a ponese con diez puestos de retrasu na parrilla de salida sobre'l tiempu que faiga.


Asina, Fernando Alonso, que marcó nos entrenos cronometraos acabantes de celebrar un tiempu de 1,18,811 col que tendría acutada la 6ª plaza, va tener que salir diez posiciones más p'atrás, na 16ª plaza. Ellí, encasquetáu ente los dos Jordan de G.Pantano y Nick Heidfeld, l'asturianu va tener qu'esforzase muncho pa ser a entrar nos puestos de cabeza na carrera que se cuerre mañana dende les 3 de la tarde (hora peninsular) nel circuitu de Silverstone, ún de los clásicos del calandariu de competición.

D'otra manera, la Pole Position foi pa un sorprendente Kimi Raikonen (McLaren Mercedes) mientres que'l campeón mundial Michael Schumacher nun fizo unos entrenos curiosos y va salir en tercera posición tres del so compañeru d'equipu Rubens Barrichello. Otru compañeru d'equipu, el de Fernando Alonso, Jarno Trulli, marcó'l quintu meyor tiempu, una décima de segundu más rápidu qu'Alonso