La Caravana pola Oficialidá recuerre'l suroccidente astur

La organización "Conceyu Abiertu pola Oficialidá" va celebrar esti sábadu 27 d'ochobre una nueva actividá pa llevar la reivindicación de la oficialidá a tolos conceyos d'Asturies, la conocida Caravana pola Oficialidá, que va pasar pelos conceyos de Cangas, Tinéu y Allande, saliendo de la plaza de Las Campas de Tinéu a les 10 y media de la mañana. La caravana de coches quier convidar a la participación de los ciudadanos nel movimientu de reivindicación llingüística, y el CAO lleva organizandola periódicamente dende marzu del 2006, en que la primer edición anduvo pela cuenca del Nalón. Nesta ocasión, la xornada va acabar con un actu festivu que va facese en Teatru Conde Toreno de Cangas a les 19.00 hores, contando coles actuaciones de los músicos Pedru Pereira, Rafa Lorenzo, Xosé Ambás, Diego Pangua, Dolfu R. Fernández y Roberto Ablanedo, que van actuar ennte les intervenciones de los representantes de la plataforma. P'acabar el día, hai preparáu un "filandón" nel bar Caniecho de Cangas.


La Caravana ya tien prevista una nueva convocatoria pal 3 de payares, que va andar los conceyos de L.lena y Ayer, too con vistes a preparar l'ambiente pa la gran manifestación pola oficialidá que va tener llugar el 24 de payares n'Uviéu.