La Caravana Pola Oficialidá anduvo pel Caudal

El Conceyu Abiertu pola Oficialidá, plataforma na que s'inxerten más de cien organizaciones polítiques, sindicales y culturales col oxetivu de que se recueya la oficialidá del asturianu na próxima reforma estatutaria, celebró esti sábadu una nueva edición de la "Caravana pola Oficialidá", na qu'una riestra de más de trenta vehículos anduvieron pel conceyu de Mieres en caravana informativa y de repartu de propaganda, continuando coles que se fixeron en Siero y na Cuenca del Nalón.

D'otra manera, el CAO tien abierta n'Avilés la esposición que baxo'l títulu "amuesa pola oficialidá" axunta obra de creadores plásticos d'estremaes tendencies como Fernando Alba, Adolfo Manzano, Pablo Maojo, Alejandro Mieres, Ricardo Mojardín, Ánxel Nava, Hugo O'Donnell, Gustavo Ordiz, Adelaida Ovana o César Ripoll ente otros munchos hasta facer una llista de más de 50 artistes.

Les obres, que tan espuestes hasta'l prósimu día 2 de xunu nel Palaciu de Valdecarzana, na Cai La Ferrería d'Avilés, van vendese nuna puya benéfica al favor de la organización que va tener llugar el sábadu 3 de xunu a les 7 de la tarde nel mesmu muséu avilesín. Los precios de salida de los trabayos artísticos a la venta y ente los qu'hai grabaos, cuadros o materiales procedente de "performances" van dende los 3 euros d'un arfueyu procedente d'una aición del bardu errante hasta los 1.200 que se piden por una escultura del artista Pablo Maojo.