La Caravana pola Oficialidá anduvo la Cuenca'l Nalón

El soníu del pitu de los más de trenta coches de la Caravana pola Oficialidá restalló esti sábadu na cuenca'l Nalón. La Caravana, actividá organizada pol Conceyu Abiertu pola Oficialidá, foi tou un éxitu na so primer salida, según la valoración de la mesma organización, axuntando una montonera de xente dende pela mañana hasta l'actu col que pesllaba la caravana pela tarde. (Ver galería de semeyes)

La hora y sitiu de salida pa esta actividá reivindicativa de la oficialidá del asturianu yeren les 11 la mañana d'esti sábadu día 4 nel aparcamientu de la estación d'autobuses de La Felguera. Ellí foron llegando adulces los coches que teníen qu'iguar la caravana. Xente del conceyu de Llangréu y demás llugares de la cuenca, anque tamién munchos que dende Xixón o Uviéu foron a amestase a esta iniciativa. Nel aparcamientu podía vese a xente del mundu del asturianismu y d'organizaciones que tán nel CAO, como'l portavoz de la Xunta pola Defensa de la Llingua Xulio Casado, el miembru de Xeira Xosé Miguel Suárez "Tapia", el Director de l'Axencia Asturiana de Cooperación al Desarrollu Rafael Palacios, el cantante de Nuberu Chus Pedro, los escritores Chechu García y Ana Vanessa Gutierrez o'l portavoz d'Izquierda Asturiana en Xixón y tamién escritor Pablo Rodríguez Alonso.

Sobre les 11 y media la caravana echo a andar con cerca de trenta coches adornaos con carteles y banderes, y encabezaos por una furgoneta que diba dando pela megafonía conseñes a favor de la oficialidá del asturianu, amás de convidar a asistir al actu que diba facese de tarde. La llarga retafila d'automoviles pasó peles cais de Sama, L'entregu, La Felguera, Blimea, Sotrondio, Los Barreos y la Pola Llaviana. Nesos llugares los coches nun dexaron de facer sonar les bocines, respondiendo munches vegaes cola so bocina coches que diben n'otra dirección pero que queríen amosar el so sofitu a la iniciativa del Conceyu Abiertu pola Oficialidá. La caravana tamién paraba pa baxar de los coches y repartir ente la xente del llugar cartafueyos nos que s'esplicaben el significáu de la palabra la oficialidá y los argumentos del CAO xustuificando la necesidá de la msma. Dempués d'unes cuantes hores recorriendo la cuenca'l Nalón, la caravana acabó cuando volvió hasta La Felguera, onde munchos de los participantes na mesma foron a xintar a la Sierra'l Trabanquín, chigre rexentáu, otramiente, pol guitarrista de Nuberu, Manolo Peñayos.

El día acababa con un actu nel Teatru de L'Entregu a les siete la tarde. El teatru tuvo nun tris de llenar les sos más de trescientes butaques, y ello ye que'l programa yera atractivu abondo y la tarde acabó entrada n'agua, dalgo qu'animaba a abellugase. L'actu, presentáu por Henrique Facuriella y Ana Vanessa Gutiérrez, entamó cola actuación de la Banda Gaites Rei Aurelio y l'Agrupación d'Etnografía y Folclore L'Esperteyu. Metanes les actuaciones los componentes de la tertulia lliteraria Reciella Mallory lleeron poemes faciendo un recorríu pela historia de la lliteratura asturiana hasta güei. Nel actu tamién tuvo presente la música de Carlos Rubiera al traviés del grupu voces de neños y neñes "Y los del Bosquín". El toque teatral diolu l'humor del monologista Cellero que contó la particular aventura que-y pasó a los del so pueblu cuando fueron a quitar galipote a Galicia. El puntu y final musical al día diben dalu dos grupos bien conocíos na música asturiana. Per un llau Tuenda, qu'actuó alredor de 25 minutos que-yos valieron pa facer un recorríu pelos cantares del so discu, sofitar la iniciativa del CAO y criticar l'actitú de los gobernantes asturianos pa col asturianu per boca del so cantante Xosé Ambás. Nuberu, acompañaos pol pianista Gabino Antuña, actuaron los caberos y amosaron lo especial que yera pa ellos tocar naquel sitiu y por aquella causa, que describieron gráficamente como "tar como en casa lluchando polo de casa".

Asina finaba un día nel que los habitantes de la cuenca'l Nalón vieron, oyeron y en dalgunos casos pudieron compartir la revindicación llingüística, que nun para, y que'l próximu día 28 de marzu va dir hasta'l Conceyu de Siero cola siguiente Caravana pola Oficialidá.