La candidatura asturianista plural amplíase a los conceyos

Al mesmu tiempu que les negociaciones ente BA y UNA van dando pasos finales, ábrense puertes a l’ampliación d’esti proyectu plural d’izquierda asturianista. El secretariu d’organización d’UNA, Roberto Holgado, fala d’ello.

“Hai bon recorríu en cuantes al alcuerdu y posiblemente a primeros de febreru se puea presentar”, declara Holgado a ASTURIES.COM sobre’l procesu de creación d’una alternativa asturianista, ecoloxista y d’izquierda.

Otru de los actores d’esti procesu, el portavoz del Bloque por Asturies Rafa Palacios, yá señalara a ASTURIES.COM qu’aspiraben a crear una alternativa lo más plural posible y que nun quedara namás qu’en Bloque por Asturies y UNA. Nesti sen, Roberto Holgado comenta que la propuesta ta moviéndose tamién nos conceyos.

“Tamos falando con organizaciones como UICA a nivel de Carreño, Asturianistes por Nava, y otres candidatures independientes n’otros conceyos”, comenta’l secretariu d’organización d’UNA sobre estos contactos n’ámbitu municipal. D’esti mou, espón que “l’oxetivu ye crear un movimientu ampliu ente Bloque, UNA, independientes, organizaciones d’ámbitu llocal y colectivos d’otru tipu”.

Sobre’l candidatu
“Les organizaciones nun tomamos tovía nengún determín aprobáu sobre’l candidatu”, responde Roberto Holgado sobre les especulaciones al rodiu de quién va ser el candidatu p’Asturies nesti procesu.

P’acabar, Holgado sorraya nesta llínia que’l proyectu “nun se pue centrar en cuestiones de candidatos, porque entós paecería qu’esto xira al rodiu de persones”. “Esti proyectu xira sobre organizaciones, independientes y, sobre tou, idees”, sentenció’l miembru d’UNA.