La canalización qu'estroza un ríu

La Coordinadora Ecoloxista d'Avilés denunció esta selmana que les obres de canalización que vienen faciéndose en ríu Raíces dende'l conceyu de Salinas y qu'agora van metese per Avilés, puen dañar enforma l'ecosistema del llugar, sobremanera pa la parte de la desembocadura. Al dicir de los ecoloxistes, la obra métese pel calce del ríu, matando les orielles con escavadores y desaniciando tola vexetación de la oriella. Los trabayos de canalización tamién apreten el suelu y acaben coles zones húmedes na rodiada del ríu. Pa sofitar esta denuncia, los ecoloxistes apelen al criteriu del urbanista Ramón Fernández Rañada, que yá nel 1994 nel Avance del Plan Especial pa la Protección del Espartal falaba del valir mediuambiental del Raíces y pidía que nun se ficieren obres de canalización nel so calce.

Por too ello, los Ecoloxistes avilesinos metieron un escritu per rexistru del Principáu en que se pide, ente otros puntos, que se paren les obres y que se faiga una revisión del espaciu que se considera como dominiu públicu del ríu acordies a la Llei d'Agües en cuantes qu'esta podría incluyir un espaciu más grande que'l que marca'l calce. De ser asina, los proyectos qu'hai paconstruyir na oriella del ríu nun podríen facese.