La campaña informativa institucional poles eleiciones del 28-M va incluyir l'asturianu y el gallego-asturiano

Va desendolcase ente los díes 12 y 26 de mayu con presencia en múltiples soportes.

Juan Manuel Cofiño, conseyeru d'Alministración Autonómica, Mediu Ambiente y Cambiu Climáticu, compareció esta mañana na Xunta Xeneral énte la Diputación Permanente pa informar sobre la campaña informativa institucional sobre les eleiciones del 28 de mayu. "Inclúi soportes gráficos y audiovisuales", apuntó'l vicepresidente, como "cuñes de radio en castellanu, n'asturianu y fala eonaviega" o "spots de televisión".

Tamién va tener presencia en redes sociales, en concreto Facebook, Twitter y Instagram; en cartelería de tamañu A3 pa distribuyir a tolos conceyos; en mupis pa los ayuntamientos que dispongan mobiliariu urbanu que cedan de baldre; y en videotutoriales pa YouTube. Nestos casos concretos Cofiño nun especificó les llingües que se van emplegar, como sí fixo con respeuto a los materiales pa radio y televisión, anque lo lóxico sería que s'incluyesen les trés en tola campaña.

Ésta va centrase en treslladar a la ciudadanía información sobre la fecha y el procedimientu de votación, la esposición de les llistes del censu eleutoral, l'exerciciu del derechu al votu per corréu, y datos d'interés pa los eleutores que tean temporalmente nel estranxeru, pa los eleutores permantes residentes nel estranxeru y pa les persones ciegues y con discapacidá visual grave conocedores del sistema braille. La empresa seleicionada nel concursu de contratación foi Bittia.