La campaña de vacunación contra’l gripe da aniciu esti llunes

Pese a que’l sol y les temperatures altes que ta viviendo Asturies estos díes nun afalen a pensar na llegada de la seronda, Salú yá dio entamu a la campaña de vacunación contra’l gripe. Asturies alquirió 227.000 dosis esti añu.
 
La vacuna empleada ye trivalente, como ye vezu, siguiendo les recomendaciones de la Organización Mundial de la Salud (OMS). Ente los grupos de riesgu a los que se-yos recomienda tomar la vacuna tán les muyeres embarazaes, los enfermos crónicos, les personas con obesidá mórbida, los mayores de 65 años y los profesionales sociosanitarios. La campaña, que va prolongase per cinco selmanes hasta’l 4 de payares, s’apoya con cartelería pa centros sociosanitarios, dípticos informativos y una guía téunica.
 
El direutor de Salú Pública, Alberto Fernández, incidió esta selmana en que la vacuna ye “efeutiva” frente al gripe y “segura enforma”. Por ello, animó al personal sociosanitariu a que tenga una actitú “exemplarizante” y se meyoren les tases baxes de vacunación d’otros años ente esti coleutivu. Otra manera, hai que destacar qu’esti añu centralizóse la compra con otres comunidaes, de tal forma que se reduxo’l coste un 22 por cientu respeuto a la campaña del 2010, cuando l’adquisición de 231.480 dosis supunxo a Asturies una partida de 1,19 millones de euros. Esti añu, les 227.000 dosis mercaes tuvieron un preciu de 932.006,40 euros