La Caixa abandona'l Sabadell, titular de Banco Herrero

La entidá catalana La Caixa dio anuncia ayeri de la so salida del accionariáu de Banco Sabadell, que ye al empar el dueñu de Banco Herrero, entidá bancaria histórica d'Asturies fundada en 1912 y que, dende l'añu 2003 enxertóse dafechu como unidá de negociu de Banc Sabadell, convertiéndose na marca comercial cola que trabaya esti grupu bancariu n'Asturies, Cantabria y Castiella y Llión.

La Caixa, la mayor caxa d'aforros d'España, va abandonar dafechu l'accionariáu del Sabadell, que ye'l quintu grupu bancariu español por capitalización bursátil. La Caixa, que tenía'l 12,45 por ciento del Sabadell, yá vendió ayeri por importe de 813 millones d'euros, el 7,95%, que quedó en manes del bancu suizu d'inversión UBS y d'un grupu d'accionistes del Sabadell ente los que tán el presidente del bancu José Oliu y los empresarios Joaquín Folch-Rusiñol (Pintures Titán), José Manuel Lara (Editorial Planeta) y Isak Andic (Mango). Queda por conocese'l destín del 4,5% que falta, valoráu en 482 millones y pal que La Caixa yá tien compradores.

La Caixa entrare nel Sabadell nel añu 2000 garrando'l 15% del grupu a cambiu del inxerimientu en Sabadell del asturianu Banco Herrero, que yera entós el primer bancu d'Asturies y que La Caixa mercare nel añu 1995. El Sabadell yera dueñu, pela so parte, del Banco Asturias, segunda entidá de banca privada d'Asturies. Herrero y Sabadell amestáronse nuna única entidá que quedó en manes del Sabadell y que se convertió, dende marzu del 2003, na so marca comercial p'Asturies.