La burbuya d'internet (I)

Yera´l añu 2.000 cuando tolos inversores taben ablucaos pola nueva maravilla que allumaba´l mundiu: el fenómenu d´Internet treslladáu a les empreses, y d´elles a los parqués de les bolses internacionales. Empreses que nun dií de cotización bursátil valíen más que delles empreses tradicionales como General Electric o la Ford. Tábemos delantre de la Nueva Economía. Entós la nueva moda yera la de los executivos ensín corbates garraos a un portátil conectáu a la rede de redes.



Tamién xurdió la figura del mozu emprendedor de ventipocos años, ensin esperiencia de trabayu pero con munches hores de llibros, qu´empobinaba empreses d´Internet col sofitu económicu de ambicioses compañies de capital riesgu. Dellos millones de dólares invirtiéronse en proyeutos ensin más encontu qu´una presentación en PowerPoint y un informáticu que-y echaba cuentu pa presentar a los inversores una empresa ensin futuru posible. El propotipu d´emprendedor yera un rapaz con munches idees pa la rede y con un MBA en dalgún centru de negocios de prestixu. Y dacuando nin eso. Nengún inversor quería quedar atrás. Toos entamaron una carrera irracional d´invertir en too aquello que llevare l'apellíu puntu com. De xuru toos querien imitar a la incubadora y capital riesgu CMGI norteamericana, que fizo un negociu d´oru con Amazon.com y col buscador
Altavista, ente otres empreses d´ésitu, mientres que per otru lláu la mocedá emprendedor admiraba a xente como los fundadores de Yahoo!. Esi calter d´emprendor d´ésitu llegó al estremu de que pa la parte de Silicon Valley cualquier mozu o moza de 25 años que nun fuere millonariu gracies al ésitu de la so propia empresa puntucom yera un fracasáu.



Esi guañu d´idegues y inversores arriesgaos que yera Silicon Valley viera nacer delles empreses tecnolóxiques dende los 70 como Intel, Cisco, Sun Microsystems o llaboratorios de biotecnoloxía de toa triba. Silicon Valley ye un prósperu condáu en Santa Clara, California, onde les industries qu'entamaron por primera vegada allí usaben el siliciu pa facer semiconductores. L'ésitu del Valle del Siliciu vien en parte pola influyencia de la Universidá de Stanford, onde ye normal que profesores y universitarios se xunten pa entamar spin-offs, que son empreses de tecnoloxía feches dende los llaboratorios de la universidá. (Los mesmos spin-offs que son un espeyismu na universidá asturiana).



Como tolo que xube tien que baxar primero o más llueo, la burbuya pinchó y la necia realidá impúsose. Los planes d´empresa de les puntucom nunca nun se cumplieron, y los inversores nun volvieron a ver les perres que punxeren. Primero, les espectatives nun se cumplíen y nun mercaba per internet el númberu de xente que s´esperaba. Segundo, los inversores esixíen retornos de dineru que nun llegaben, ello mientres los valores de empreses d´Internet taben sobrevaloraos y teníen unos precios que nun respondíen nin al valor en llibros nin tampoco a unes espectatives yá fracasaes. Llueu les compañies de capital riesgu y les incubadores dexaron de poner perres y les puntucom entamaron a pesllar. Finalmente, el sector d´Internet menguó asgaya y lo que quedó reconvirtióse. Por exemplu con la burbuya xurdieron bien de consultores d´Internet como Icon Medialab, BlueC,
Havet Interactive, 100world, Júpiter Communicatios, MarchFirst o IXL. Les más d'elles pesllaron y les que quedaron agora dedíquense a diseñar webs... y poco más. Anguaño, el sector de nueves tecnoloxíes ta estragáu, y yá nun hai perres pa proyeutos d´internet d'aquellos que quitaben hasta´l catarro.