La Bandina'l Tombo estrena discu n'Asturies.com

Güei ufiertámos-yos a los nuestros llectores la posibilidá de descargar un cantar del nuevu discu de "La Bandina'l Tombo", que presenten güei de nueche n'Uviéu.

Güei xueves, a eso de les 22:00 hores, "La Bandina'l Tombo" presenta'l so primer trabayu discográficu nel hotel "La Gruta" de la capital asturiana. Esti conciertu d'estrena va tar dientro del actu de presentación del programa de los Alcuentros Tradicionales de Trebolgu 2004, polo qu'amás de la bandina tamién van tocar les bandes que van participar nos Alcuentros, de los que vamos falar mañana detalladamente. Pa dir a esti actu hai que mercar una entrada de namás cinco euros na llibrería Paraxuga o nos chigres Cá beleño o L'Esperteyu d'Uviéu.

Pero gracies a la cortesía de la bandina, güei pa podemos sentir de baldre un cantar del nuevu discu d'esta formación. El cantar ye "Ruxinas (xotes)" y pa descargalu namás qu'hai que calcar equí. Esti ye'l primer corte d'un discu de quince temes nel que tenemos un repás a les formes musicales de la tradición asturiana, pasodobles, xotes, muñeires, saltones, valsiaos...etc. La "Bandina'l Tombo" sigue fiel al so soníu acústicu, compactu y de perbona execución, soníu, que como bona bandina que ye, tien una innegable intención de facer baillar al que lo escucha.

"La Bandina'l Tombo" ta formada por Carlos Tejerina "Chiri": contrabaxu, Dolfu R. Fernández: vigulín y turullu, Marga Lorences: curdión y pies, Pepín de Muñalén: flauta, cuyares y bombu. Pero pa esti discu nun tuvieron solos, y p'algamar el bon resultáu final echáron-yos un gabitu unos cuantos collacios, casu de Xosé A. Fernández "Ambás" a la voz, Xaime Arias al piano, Diego Pangua y Borja Baragaño a la xiblata, Xurde Fernández al vigulín y mandolina, Manuel Cordero al redoblante, Daniel Lombas al bombu y fierros, Lorena G. Caro al clarinete, Juan Piedra a la trompeta y Alfonso Mollá a la tuba, ente otros.

Esti discu representa pa esta bandina'l frutu d'un trabayu de muncho tiempu llevao con paciencia y coherencia. Dende que nacieron en 2001 son incontables les fiestes, mercaos o nueches folk onde los músicos fueron creando esi soníu inconfundible de Tombo-folk. La bandina tien claro que "ñació cola intención de recuperar l'espíritu de los bailles que se facíen n'Asturies a la fin del sieglu XIX y a primeros del XX." Y por ello'l so repertoriu ta formáu por "por pieces a lo suelto (como la xota, el saltón, la muñeira, la xirandiya...) y poles nueves pieces a lo agarrao (la polca, el valse, la mazurca, el pasudoble...). Ye una música pensao pa baillar y pasalo bien" . El cd sal a la cai col sellu creáu polos componentes de "Felpeyu" Ígor Medio y Carlos Redondo, "Tierra Discos". Grabóse nel estudiu La Factoría, en Piedras Blancas, el diseñu ye d'Antón Barquero y La Bandina'l Tombo, y el grabáu de la portada ye de Xosé Antón Fernández "Ambás". Les igües de toles pieces y producción executiva y artística ye de la propia "Bandina'l Tombo".