La Bandina presenta "De Romandela" el so discu nuevu

Güei miércoles preséntase por fin nos locales de la
SGAE d'Uviéu'l nuevu trabayu discográficu de La Bandina,
espublizáu por FonoAstur y que llega a les tiendes col títulu de
"de romandela". Ellí los componente del grupu, Pablo
Pumarada, David Varela, Santi Caleya y Merce Santos, van presentar esti discu
que cambia un poco'l rumbu musical que llevaba'l grupu. Lo que nun quier dicir que queden al
debalu, porque los miembros de La Bandina tienen bastante claro pa onde quieren
dir, y cuales son les influencies que los empobinen a sacar el soníu que
tienen nesti cd. El grupu afonda nel desarrollu melódicu de les pieces,
con usu permanente de voces y armoníes trabayes, obligándonos a nun perder
detalle de nengún cantar. Pa desenvolver bien esta xera,
amás del bon facer los miembros del grupu, La Bandina llevó hasta l'estudiu de grabación a músicos como'l
baxista Luis Rodríguez o'l trombón de Marcos Malnero, que
xúnense a la zanfona de Merce Santos, la gaita y saxu de Santi Caleya,
les percusiones de Pablo Pumarada y el curdión de David Varela, que pasa
de tocar la percusión nel grupu al curdión pa sustituyir a
Octavio Trapiella, antiguu curdioneru de La Bandina.



El grupu tamién tamién echó mano d'amigos pa dalgunos de los 5
temes cantaos del discu. Asina tenemos a Anabel Santiago que pon la voz en La
Taza, o El repunte de la media blanca, onde la calidá de la voz d'esta cantante
refuérzase col acompañamientu de la sección instrumental,
p'apurrinos al final los meyores momentos del discu. Tamién rescampla
nesti sen la participación del cantante de tonada Jaime Caleya,
ayerán y pá del gaiteru del grupu Santi Caleya, que demuestra nel
cantar "Que gastamos amistá" la fuerza de la voz que-y fizo
grabar dellos discos a lo llargo de la so carrera. Nun podía faltar nel
cd ún de los temes más conocíos de La Bandina, "Na
Caleya", del que l'oyente va topar una versión normal y otra "remix" fecha pol
productor co-productor Sergio Rodríguez.



Asina, dempués de sentir el discu vamos poder decatanos de que,
anque les comparaciones seyan odioses pero de xemes en cuando necesaries,
respecto
al
discu anterior el grupu evolucionó en delles estayes. Ello ye que'l
cambiu nun ye radical, pero a naide se-y va escapar que'l grupu buscó un
estilu nuevu, yá se sabe, renovase o morrer. La Bandina xugó a arriesgar, y
apostó por un soníu nuevu, que como ellos confiesen ta
influenciáu por grupos como Skolvan o Blowzabella.



La Bandina quier que tol mundu conoza esi estilu nuevu, asina que pa
entamar güei Asturies.com ufierta, gracies a la cortesía del
grupu, un cantar d'esti discu, concretamente La Taza (...romandela) Amás, pa
poder sentir el discu enteru ufiertamos la posibilidá a los nuesos
llectores de mercalu na nuestra tienda n'internet Asturshop.com.