La Bandina prepara discu con un soníu nuevu

David Varela comentó p'Asturies.com como va ser el próximu discu de "La Bandina", un pasu alantre na so evolución qu'esperen entamar a grabar en febreru.

"La Bandina" ye un grupu mui conocíu per bien de nueches folk d'Asturies. El so soníu sólidu, acústicu y arreyáu a la tradición musical asturiana ye una garantía pa pasalo bien nos sos conciertos. Esti soníu espeyóse nun discu l'añu 2002, "!Pa Bail.lar!", que foi'l debú discográficu de "La Bandina". Pero dempués de trés años y incontables conciertos, llega'l momentu de siguir evolucionando, yá se sabe, renovase o morrer. Ello ye que "La Bandina" va grabar esti mes de febreru'l so segundu discu.

"Fonoastur" va ser otra vuelta la casa de discos cola que va salir el discu "La Bandina", y anque tovía ta por confirmar l'estudiu de grabación, David Varela comentanos que "si tenemos claro que la producción musical va correr de la nuesa cuenta, con igües propies en casi tolos cantares y munches composiciones de nosotros mesmos". Esta yá ye una novedá nel grupu, que tira más poles composiciones que polo temes tradicionales como ficieron nel discu anterior. Pero 'l discu va amosar un ciertu cambiu nel estilu del grupu, "vamos facer lo que nos gusta, l'estilu que más nos presta y onde van notase influencies de la musica bretona y centroeuropea como "Skolvan" o "Blowzabella", nesti sentíu Varela aclara que "nel discu anterior sacamos otru soníu, un poco poles prieses, anque quedáramos mui contentos col resultáu. Pero esta vez tuvimos tiempu pa preparalu, los temes, les igües, l'estilu...etc, colo que vamos tener un productu más acordies colo que queremos". Con too y con ello que naide s'asuste, "La Bandina" va siguir fiel y coherente al so estilu anque dando un pasu alantre pa nun estancase. Ello ye qu'ente les composiciones y los temes foriatos ehí van tar mecíos una xota'l centru de gaita y tambor, un son d'arriba, una muñeira'l centru y incluso una tonada ente'l gaiteru Santi Caleya y el so pá'l cantante Jaime Caleya.

Pa buscar y topar el nuevu soníu'l grupu ta buscando refuerzos. Per una llau "La Bandina" va incorporar pa esta grabación un baxu eléctricu. Pal discu amás esperamos contar con delles collaboraciones, como la del nueve veces campeón en bretaña de pareya gaita y bombarda Pascal Guingo, y otres qu'inda tán por confirmar".

"La Bandina" espera tener el discu pa selmana santa y presentalu nel Teatru Xovellanos de Xixón. Amás, yá col discu embaxo'l brazu, el grupu de Santi Caleya, Octavio Trapiella, Merce Santos, Pablo Pumarada y David Varela va entamar en xunetu la so primer xira europea per Portugal y Francia.