La Bandina graba'l so nuevu discu en Corvera

El grupu asturianu "La Bandina" ta metíu nel estudiu de grabación pa sacar esta primavera'l so segundu discu. Fuimos hasta l'estudiu en Corvera pa falar sobre esta grabación, que va estrenase n'esclusiva n'Asturies.com.

La xera de grabar un discu ye bien complicada y delicada. Nunos díes hai qu'espeyar delantre d'un micro munches idegues, igües, sensaciones, y amás solucionar munchos problemes colos que nun se contaba, que munches vegaes faen el camín un poco más pindiu. Pero con paciencia, y sobre too bon facer, los miembros de "La Bandina" y el so técnicu na grabación, Sergio Rodríguez, tán llevando alantre esti esperáu segundu discu que yá podemos adelantar que vamos dar estrenu n'Asturies.com. Nesti sentíu David Varela, curdionista y percusionista del grupu, comentónos que "el trabayu ta siendo duru, pero tamos viendo yá que'l resultáu final va ser precisamente lo que queríemos". Evidentemente esti resultáu nun ye una casualidá, "tamos notando les hores de trabayu que ficimos enantes de metenos nel estudiu, asina qu'esperemos que too vaya como nos lo propunximos de mano".

Anque una vegada que s'entra nel estudiu de grabación ye cuando apaecen cambios y propuestes, sobre too de la mano del técnicu de la grabación, Sergio Rodríguez, responsable de los estudios "Tutu" de Corvera onde ta grabando "La Bandina". Sobre l'aportación de Sergio, que tamién ye técnicu de "Dixebra", Santi Caleya comenta que "tamos percontentos col trabayu de Sergio, ye un gran profesional col que se fai mui fácil trabayar y solucionar los problemes. Por exemplu, vamos sustituir dalgo de la percusión "agresiva" que teníemos por otres soluciones aportaes por Sergio que van danos el mesmu resultáu, y que vamos poder facer nos directos". Gracies a esto'l grupu ta centrándose "más nel aspectu melódicu y sobre too armónicu del cd".

Nesti nuevu discu de "La Bandina" vamos topar un nuevu soníu ensin romper una linia de continuidá pero nel que tamién va conocese un pasu alantre. Pa ello cambia l'estilu de los temes y tamién hai cambeos na formación. David Varela va sustituir a Octavio Trapiella nel curdión, y incorpórase un nuevu miembru al grupu, Daniel Jiménez, que va tocar el baxu nos directos. Pa la grabación tán contando col baxu de Luis Rodríguez, conocíu de vieyo de Santi Caleya y David Varela cuando compartieron escenariu con "Folkgando". Nel tarrén de collaboraciones, amás del mencionáu Luís Rodríguez, va tar la voz d'Anabel Santiago, les percusiones d'Antón Barquero y la tonada de Jaime Caleya, padre del gaiteru de "La Bandina" Santi Caleya. Otramiente, tamién grabaron cola collaboración d'un bon grupu d'amigos del grupu los coros d'ún de los temes más carísmáticos de "La Bandina", el conocíu "La Caleya".

Los miembros del grupu cuenten con acabar el procesu de grabación nesta selmana, pa pa poder asoleyar el discu'l mes qu'entra. Anque de toes maneres, n'Asturies.com vamos ufiertá-yos a los nuestros llectores un adelantu del discu díes enantes de que salga a la venta. L'aficionáu a la bona música asturiana tien de tar sollerte, porque'l discu de "La Bandina" ta al caer.