La bandina en Caldones y Hevia en Llanes

Nesti tiempu en qu'abunden les romeríes, hai conciertos de folk per
toa Asturies, de los que vamos a informavos a toos aquellos y aquelles que nun
se conformen solo colos "Operación Triunfo".

Lo más cercano ye esti llunes 22 en Caldones, parroquia xixonesa que
celebra les sos fiestes estos díes. El llunes, amás de
l'actuación de les típiques orquestes de romería, vamos
poder ver a "La Bandina", banda liderada pol gaiteru ayerán
Santi Caleya. Esti conciertu sedrá sobre les 22:00 hores nel propiu prau
de la fiesta, y ye una perguapa iniciativa, por parte de la comisión de
festexos, incluyir nel programa d'actuaciones musicales la d'un grupu de
música tradicional asturiana.

Si saltamos al próximu vienres 26 entós podremos ver a
"Hevia", grupu del gaiteru Jose Angel Hevia al qu'últimamente
nun tenemos munches oportunidaes de velu actuar n'Asturies. El conciertu va ser
en "Naves", localidá del conceyu de Llanes, por aciu de les
fiestes del llugar, si queréis conocer coses d'esti pueblu vos
convidamos a que visitéis esta web. El gaiteru maliayés
interpretará dalguno de los temes del so próximu discu,
qu'esperase tea na cai pal mes de septiembre.