La Banda Gaites Villaviciosa – El Gaitero lidera la “Liga Galega de Bandas de Gaitas”

Dempués de celebrase n'Aveiro (Portugal) esti domingu 20 de marzu la segunda fase d'esta lliga qu'enfrenta a les meyores bandes de gaites de Galicia y d'otres comunidaes ye una banda asturiana, la de Villaviciosa, la que lidera esti importante campeonatu.

La "Liga Galega de Bandes de Gaitas" ye la competición de gaita más grande de la península. Más de 100 bandes de gaites compiten nesti campeonatu, que s'estrema en cinco divisiones distintes acordies col nivel musical de cada banda participante. Anque la mayoría de les bandes inscrites son conxuntos gallegos,yá seyan de la mesma Galicia o de cualquiera de los centros gallegos espardíos per tola península, hai tamién una participación "estranxera" qu'incluye pel momentu a una banda portuguesa y dos asturianes, que son la Banda de Gaites de Candás y la Banda de Gaites de Villaviciosa, que ye la que manda agora mesmo la clasificación dempués d'imponese esti domingu na segunda preba de la lliga que se celebró n'Aveiro (Portugal).

La banda de Maliayo, que yá ganare nel mes de payares la primer fase del campeonatu, algamó n'Aveiro una puntuación de 92,75 puntos sobre 100 posibles, ún más que la Banda de Gaitas Ledicia de Pontevedra, segunda clasificada nesta fase y tamién segunda na xeneral del campeonatu. Con ello, la banda de Gaites de Villaviciosa, que a lo llargo de munchos años contó cola dirección de José Ángel Hevia y qu'agora dirixe Martín Poladura Berros, adelántase na xeneral y sáca-y yá una diferencia de más de cinco puntos a la banda pontevedresa, colo que los asturianos tan a piques de consiguir el trunfu final nesti campeonatu.

Pa ello va haber qu'esperar a la tercera y última fase de la lliga, que va tener llugar na estación ivernal de Cabeza de Manzaneda (Ourense), el 31 de xunetu. La Banda Gaites Villaviciosa, que cuenta col patrociniu de Sidra El Gaitero, enfótase en caltener la primer plaza nesta tercera fase y convertise asina na primera formación non gallega en ganar la "Liga Galega de Bandas de Gaitas". Otramiente la Banda Gaites Villaviciosa ta tamién acabante d'escoyese pa representar a Asturies nel Festival Intercélticu de Lorient que va celebrase ente'l 4 y el 14 d'agostu.