La Banda Gaites Güestia entregó los sos premios añales con un actu emotivu nel Teatru Vital Aza

Mapi Quintana y Luis Castañón recibieron el sábado los Premios Güestia 2013 nun actu emotivu nel Vital Aza de La Pola Ḷḷena. La Banda Gaites Güestia tamién nomó como miembros honoríficos a ‘Cai’, Fechu n’Asturies y Guzmán González.

El periodista Álex Boada encargóse de presentar un actu qu’abrieron los neños y neñes de la escuela de gaita de la Banda de Gaites Güestia énte los aplausos del públicu presente nel Vital Aza. Darréu, procedióse a la entrega del Güestia a la cantante llocal Mapi Quintana, non ensin enantes lleer la so biografía y proyeutar un videu resume de la so vida. Quintana dedicó-y el premiu a la so familia y tola xente qu’apostó por ella, y pidió a los asistentes al eventu qu’apoyaran a los fíos na realización de los sos suaños.

Liseo Quiñones, gaiteru gallardonáu na edición anterior del premiu, y Andresín ‘El d’Insierto’ actuaron a continuación, pa depués dar pasu al actu d’entrega del Güestia a Luis Castañón, que tamién tuvo videu dedicáu. El deportista de 62 años, ex futbolista del Lenense y del Caudal y ex téunicu del equipu llocal y d’otros clubes del conceyu, amás d’una persona perimportante nel asocianismu en Ḷḷena, tamién agradeció’l premiu y convidó a los sos paisanos a conocer los paisaxes del conciyu.

Tres otra actuación, nesta ocasión de Quintana, la Banda Gaites Güestia procedió a nomar miembros honoríficos a David Suárez ‘Cai’, pol so llabor como conceyal de Cultura; a la empresa Fechu n’Asturies, encargada de facer los ‘Güestia’ y les insinies, pola collaboración que tuvo siempre con estos gallardones; y al gaiteru Guzmán González al cumplir 15 años na banda de gaites. Pa zarrar l’actu, la banda interpretó dellos cantares y el so direutor, Saúl Quiñones despidió al públicu animándolu a participar na vida cultural de Ḷḷena y, sobre manera, a continuar cola tradición musical asturiana.