La Banda de Gaites “La Reina’l Truébano” celebra los sos diez años con discu nuevu

La Banda de Gaites del occidente asturianu "La Reina'l Truébano" echa'l piesllu esti vienres 22 d'avientu a los actos de celebración de la so primer década de trabayu cola presentación na casa conceyu de Navia del so LP "10 años esmelgando sones". L'actu va tener llugar a les 20 hores.

Anque Navia foi dende l'entamu la "base d'operaciones" d'esta banda, los sos gaiteros y percusionistes proceden de tolos conceyos del noroccidente asturianu, con miembros de Cuaña, Bual, A Veiga, El Franco, Villayón, Navia y Valdés. Nestos diez años, que tuvieron ún de los sos momentos más intensos cuando participaron nel añu 2004 nel Festival Intercélticu de Lorient, la banda yá asoleyare otros dos discos, "Xalea Real" y "La danza l'ocho", a los que s'amiesta agora esti "10 años esmelgando sones" nel que s'inxerten temes como Ecos de la Quintana, Muñeiras de Encarna o Pescadores xunto con `pieces estranxeres, casu de Bretzh- The King of Cardenden o un solu de percusión a cargu de Simón San José.


Con motivu d'estos diez años, "La Reina'l Truébano" actualiza tamién la so web, qu'amiesta agora una sección nueva de weblog con comentarios sobre l'actualidá de la banda que dirixe Luis Feito.