La Axencia Asturiana de Cooperación conderga los fechos d’Ecuador

L'Axencia Asturiana de Cooperación al Desarrollu refugó esti vienres "l'intentu de golpe d'Estáu n'Ecuador". "Nun ye tolerable que'l sistema democráticu pueda quebrar pola fuerza”, sostienen dende la institución pública.

Asina, el director de l'Axencia, Marcos Cienfuegos, considera que "ye intolerable que n'Ecuador dalgunos pretendan camudar cola fuerza de les pistoles lo que'l pueblu decide cola fuerza de los votos". "La democracia y l'Estáu de Derechu son conquistes incuestionables que tien de defender el conxuntu de la sociedá internacional. La democracia ye innegociable", remarca.
  
Igualmente, destacó al traviés d'un comunicáu que "por desgracia" nos últimos tiempos reparáronse fechos que suponen "un peligru real" pa la democracia n'América del Sur, como "la fracasada tentativa contra'l Gobiernu de Evo Morales, el golpe d'estáu contra'l Presidente d’Hondures o la recién inhabilitación ilexítima de la senadora colombiana Piedá Córdoba, una de les dirixentes polítiques más comprometíes pola paz nel so país".