L-R y Alfredo González y Silvia Quesada van sacar a la cai en Cangas la música d'anguaño n’asturianu

El conciertu ‘Música d’eiquí, música p’agora’ va sacar esti xueves a la cai la música contemporánea que se fai en llingua asturiana. Va ser en Cangas del Narcea y baxo la etiqueta ‘música pop’ va ufrir de baldre les actuaciones d’Alfredo González y Silvia Quesada, y de L-R.

La plaza Mario Gómez va ser la sede, dende les 13.30 hores, d’esti eventu musical qu’entama la Conseyería de Cultura, Política Llingüística y Turismu. El cantautor González va xubir en primer llugar al escenariu pa interpretar los sos temes y acompañar depués tamién al tecláu los de Quesada.

Darréu va ser el turnu de L-R, el dúu formáu por Leticia Baselgas y Rubén Bada que dende’l 2016 vien axuntando la pandereta y la guitarra eléctrica pa da-y una vuelta a folk asturianu no que se fixo llamar ‘postfolk’. D’esta forma, el públicu cangués y los visitantes que s’averen a la villa nesta xornada festiva van poder conocer trés propuestes musicales actuales en llingua asturiana, una pequeña amuesa de la calidá y variedá que tien la escena anguaño.