L’Unión Financiera quier siguir siendo la cigua del Quesos Cerrato

|
El pabellón Marta Domínguez va acoyer esti vienres el primer partíu de la segunda eliminatoria pol ascensu a l’ACB ente’l Quesos Cerrato y l’Unión Financiera Asturiana. Los uviedinos ganaron los dos partíos de lliga regular a los palentinos.
 
Esti meudía los homes de Guillemo Arenas tomaron rumbu hacia Castilla cola intención de repetir les sos bones actuaciones contra’l segundu clasificáu de la LEB Oru, que perdió dos de los seis partíos que finó con derrota en tola temporada contra l’equipu asturianu: 69-72 en Palencia y 82-76 en Pumarín. Pa los dos primeros enfrentamientos, l’Unión Financiera nun podrá contar con Daniel Fitzgerald por una recayida na so lesión de rodiya. Mentes, nel cuadru castellanu, ye probable baxa l’escolta Nick Barbour y continúa como dulda Roger Fornas.
 
El primer choque de la segunda ronda pol ascensu –a cinco partíos– va celebrase a les 21 hores, mentes que’l segundu ta previstu pal domingu a les 19.30 hores, cites nos que s’espera la presencia d’aficionaos asturianos desplazaos en coches particulares. Los que se queden n’Uviéu van poder ver los dos partíos en direuto nel Auditoriu. Mentes, el tercer choque del play-off va celebrase nel polideportivu de Pumarín el vienres próximu a les 21 hores y va ser televisáu por Teledeporte.
 
Burgos y Breogán, la otra semifinal
 

L’otru choque na llucha por algamar el derechu a competir na ACB va enfrentar a dos clásicos del baloncestu estatal, como’l Ford Burgos y el Ribeira Sacra Breogán tres el trunfu de los gallegos sobre’l Peñas Huesca (80-66) del martes nel tercer partíu de la primer eliminatoria.

 
Contador Estadistiques