L’iraquín qu’informó a Estaos Xuníos qu’había armes biolóxiques nel so país almite que mintió

Rafid Ahmed Alwan al Janabi, l’informante que convenció a Estaos Xuníos de que Sadam Huseim tenía armes biolóxiques, mintió. L’iraquín confesó al diariu británicu ‘The Guardian’ qu’inventó histores col fin d’acabar col réxime.
 
Conocíu como ‘Curveball’ pola intelixencia estauxunidense y alemana, Al Janabi aseguró nel diariu inglés que les fábriques clandestines y los camiones que tresportaben armes yeren un cuentu. “Tuve la oportunidá d'inventar algo pa derrocar al réxime y los mios fíos tán arguyosos d'ello y tamos arguyosos de ser la razón que dio a Iraq un marxe de democracia", afirmó na primer entrevista que dio hasta la fecha.
 
L'ex secretariu d'Estáu norteamericanu Colin Powell sirvióse en bona midida de la información facilitada pol iraquín pa xustificar ante Naciones Xuníes la necesidá d'invadir el país árabe, operación qu’entamó’l 19 de marzu del 2003. Pese a les secueles de la guerra y les cerca de 100.000 víctimes civiles, Al Janabi muéstrase satisfechu coles sos aiciones al entender que yera la única forma de llevar la llibertá a Iraq.