L’humor y la música xúnense’l Martes d’Antroxu en La Felguera col espectáculu ‘Antroxando’

El grupu de teatru Padre Coll y la banda Duerna entamen esti martes ‘Antroxando’, un espectáculu humorísticu-músical pa toles edaes. Delles formaciones de la zona collaboren nesta obra nes que les rises y la bona música tán garantizaes.

 

“‘Antroxando’ cuenta la historia d’una cubana y un arxentín que, por circunstancies de la vida, emigren p’Asturies, onde se conocen y pretenden llevar una rellación colos problemes que presenta la situación actual de dos emigrantes nun país en crisis”, esplica Pablo Carrera, integrante de Duerna y direutor d’esti espectáculu que cuenta con guión de Carmen López. La obra divídese en nueve situaciones que dan pasu al repertoriu de Duerna –tangos, rumbes, dances…– y a les collaboraciones de los alumnos de la escuela de música de la Asociación d’Etnografía y Folclor Reija de Llangréu, del coru de l’Agrupación Artístico Cultural Padre Coll y de la Banda Gaites Conceyu de Llangréu.

 

Les dos formaciones qu’entamen esti espectáculu pretenden facer un “homenaxe a una parte de la cultura asturiana, como ye’l fechu de mazcaritase pel antroxu” partiendo de la música tradicional y del teatru costumista asturianu. Los actores principales que participen nél son Isabel Garrido, nel papel de Lolina, y Miguel Peinado como Ché Caldero. Completen el repartu Carmen López (Lola, madre de Lolina) y Fernando Valle (Manolo). La obra va representase’l Martes d’Antroxu, a les 20.15 hores nel Teatru Nuevu de La Felguera. El preciu de la entrada pa presenciar ‘Antroxando’ (Producciones A Mansalva) ye de 5 euros.