L’Haro ye’l rival del UP Langreo na segunda ronda, mentes que l’UC Ceares va vese les cares col Trival

|
Los dos equipos asturianos que continúen nes eliminatories pol ascensu a Segunda B, el Llangréu y el Ciares, van tener desplazamientos más curtios na segunda ronda. Los llangreanos enfréntense al Haro y los xixoneses, al Trival.
 
Tres dexar atrás la cigua cola primer ronda de los play-offs, el Llangréu afronta con optimismu esta segunda ronda, na que va tener como rival a un clásicu nesti tipu d’eliminatories, l’Haro, segundu clasificáu del grupu de La Rioja qu’esta temporada eliminó al Uviéu a los penaltis na primer ronda de la Copa y que dexó fuera pol ascensu al Badajoz FC na prórroga (2-1 nel global). Los de Pablo Lago van contar col factor campu, yá que’l partíu d’ida va celebrase’l domingu a les 19 hores n’El Mazo, escenariu onde, al igual qu'en Monzón, van tener l'apoyu de la so afición. Asina, dende la web del club anuncien un autocar d'aficionaos pa viaxar nel día pol preciu de 20 euros, a lo qu'hai que sumar 12 euros d'entrada (4, pa rapazos de 14 a 17 años).
 
A Alcorcón tocará-y desplazase al Ciares, en concretu al barriu de San José de Valderas, feudu del Trival Valderas, equipu de cantera que lleva dende’l 2004 compitiendo en categoría senior. Nestos diez años pasó de xugar en divisiones autonómiques a quedar campeón de la Tercera madrilana, disputando dos fases pa xubir a Segunda B pel mediu. Na tercera nun pudo certificar l’ascensu énte’l Zaragoza B (1-4 nel global) y esta fin de selmana viaxará a Xixón cola presión de nun algamar l’oxetivu a la primera. La ida, en La Cruz, va ser el domingu a les 17 hores, onde de xuru va repetise l’ambiente espectacular que se vivió contra l’Águilas FC, con 1.300 persones nel campu xixonés. La direutiva ciarista caltién los precios: 5 euros pa los socios de los dos equipos y 12 pal públicu (5, sub-21; de baldre, sub-14).
 
L’Avilés, el domingu a les 18.45 hores
 
Yá se conoz tamién l’horariu del partíu del Real Avilés contra’l Llagostera pol ascensu a Segunda División A: les 18.45 hores. Los catalanes, otros primeros que quedaron eliminaos, nesti casu pol Real Racing Club de Santander nel aliendu últimu con un gol en propia puerta, tienen la so gran baza nel campu propiu, de prau artificial y dimensiones pequeñes, polo que los d’Uribe han d’amarrar un bon resultáu nel Suárez Puerta pa la vuelta. Los precios establecíos pol Avilés son los mesmos que contra’l Cartagena: 10 euros socios (5, sub-16) y 20, públicu (10, sub-16).
 
Contador Estadistiques