L’espectáculu ‘Árbore’ de Xera va vese en TPA

El grupu de folk electrónicu Xera ufrió’l 16 de setiembre dientro de les fiestes de San Mateo l’espectáculu que resume los sos diez años de trayeutoria. Los que nun tuvieron presentes esi día n’Uviéu van poder disfrutar de ‘Árbore’ el miércoles a les 23.45 hores per TPA. Otra manera, la canal pública emite güei la película ‘Harry el Suciu’ (22.10 hores).

En ‘Árbore’ Xera tomó los sos trés trabayos, ‘Lliendes’, ‘Tierra’ y ‘Llume’, como base del discursu del protagonista, de mesmu nome que l’espectáculu. “Esti ser dialogará con la Humanidá, personificación del cálter que distingue al ser humanu de les otres especies. Xuntos reflesionen sobre el estáu de la sociedá, del ser humanu como parte de la natura, de les raíces, del futuru, de la vida”, espliquen dende la banda.  Sobre l’escenariu podrá vese un trabayu de soníos electrónicos, voces y audiovisuales, como ye vezu en Xera.

El polifacéticu músicu asturianu Aníbal Menchaca, la Batucada Matu na Cai, Nuska Hernández y Rónán Ó Snodaigh, fundador de Kila, collaboraron nel conciertu de la plaza de la Catedral, que tuvo un llargor de 90 minutos. Ésti podrá vese completu en TPA’l miércoles a les 23.45 hores.

Eastwood n’asturianu

L’ente públicu de comunicación va emitir güei, a les 22.10 hores, la película ‘Dirty Harry’ doblada al asturianu por Gonzali Producciones. Esti clásicu del cine, protagonizáu por Clint Eastwood –al que va pone-y voz Carlos Novoa–, ta llevantando muncha espectación pese a la probe promoción fecha por TPA.