L’escocés Rua Macmillan y La Tarrancha van protagonizar los conciertos de la Folixa na Primavera

Mieres yá se prepara pa la Folixa na Primavera, que va tener llugar del 19 al 21 d’abril. Nesta edición va haber conciertos namái’l sábadu, cola presencia de La Tarrancha y del violinista escocés Rua Macmillan nel Parque Xovellanos.

La situación económica actual obliga al Conceyu de Mieres a rebaxar l’aportación pa esta fiesta cola que la ciudá recibe a la primavera, programando conciertos namái pa la xornada del sábadu. Sicasí, mientres los trés díes que dura la folixa habrá una cantidá importante d’actividaes onde la sidra, la tonada y el folclor van ser protagonistes.

Nel casu concretu de los conciertos del Parque Xovellanos, nesta ocasión mierenses y visitantes van poder disfrutar de la enerxía de la banda de mecigayu-ska La Tarrancha (23 hores), asina como de la presencia d’ún de los músicos más reconocíos dientro de la escena tradicional escocesa, Rua Mcmillan (01 hores). Natural de Nairn, población de los Highlands, esti mozu tien recibío numberosos reconocimientos na so carrera y foi ún de los artistes más destacaos del Festival de Ortigueira nes dos ediciones últimes. Hasta la fecha tien espublizáu un álbul en solitariu, de nome ‘Tyro’ (2010), amás de delles grabaciones con The Paul McKenna Band.

Aurelio Argel va recibir el XIII Distintivu a la Investigación Folklórica ‘Fini Suárez’

El presentador del programa de los 40 Principales ‘Música para raptar princesas’ y crítico musical, Aurelio Argel, va recibir el vienres 19, tres el pregón de la Folixa na Primavera, que va dar Javier Fernández López, direutor del Museu del Ferrocarril d'Asturies, el XIII Distintivu a la Investigación Folklórica ‘Fini Suárez’ pola so promoción de la música tradicional asturiana nos medios de comunicación. Esta candidatura foi presentada por Jorge Fernández Areces, representante de la Banda de Gaites Villa de Mieres, y contó col alcuerdo del xuráu formáu pol cantante de tonada José Manuel García, Conchita Suárez Fernández, Xurde Fernández y Pilar Fidalgo. Argel sucede nel palmarés d’esti gallardón a l’Asociación pa la Recuperación de Los Sidros y Les Comedies ‘El Cencerru’, de Valdesoto.

Otra manera, el cartelu d’esta edición de la Folixa na Primavera ye obra del pintor turonés Juan Luis Varela y destaca pol usu de los collores de Mieres, el mariellu y l’azul, asina como un azul más escuru cercanu al de la bandera d’Asturies. Ésta ye la cuarta ocasión na qu’esti artista fai’l cartelu de la celebración mierense.