L’Entregu va vivir esti vienres la coronación del Rei Aurelio

El VIII Alcuentru Medieval, encuadráu dientro de les fiestes de La Llaguna en L’Entregu, va tener llugar del vienres al domingu. Na primer xornada va celebrase la coronación del Rei Aurelio y la representación de ‘El rei y otres frebes’, obra de Fonseca.

L’ilustrador y escritor blimeín Alfonso Zapico va facer nesta ocasión del Rei Aurelio, papel que l’añu pasáu ocupó l’académicu Pablo Manzano. La coronación ta prevista pa les 20 hores nel Teatru Municipal de L’Entregu, onde, darréu, el grupu de teatru de l’Agrupación Artístico Cultural Padre Coll va representar la obra ‘El rei y otres frebes’ de Nacho Fonseca, escritor, académicu y creador de Seliquín y Xentiquina. Tres la función, les autoridaes visitarán el VIII Mercáu Medieval, que va tar abiertu hasta'l domingu. Mentes, a les 22 hores, va tener llugar una cena medieval nel parque de la Llaguna na que, p’asistir, ye necesario vistir ropa medieval y mercar la entrada enantes na sociedá de festexos.

Otres actividaes destacaes de les fiestes, que van allargase hasta’l llunes, día de la ‘jira’ (18 hores), son el desfile de la lluz (madrugada del sábadu, 1 hores) y el desfile medieval del sábadu (20 hores), nel que’l Rei Aurelio fai un percorríu peles cais de L’Entregu acompañáu del so séquitu y de les bandes de gaites Noega y Corvera. Mientres esta actividá, habrá una disputa ente caballeros que va resolvese’l domingu, a partir de les 20 hores, con una xusta. D’igual forma, toles nueches va haber verbena nel parque de La Llaguna.

Na semeya, Manzano nel papel del Rei Aurelio na coronación del añu pasáu.