L’embaxador d’Estaos Xuníos en Libia, asesináu nun ataque al Consuláu de Benghazi

Un ataque al Consuláu estauxunidense na ciudá libia de Benghazi terminó cola vida del embaxador, Chris Stevens, y de trés trabayadores. Dellos homes armaos llanzaron cohetes contra la sede americana na segunda ciudá del país.

Stevens finó por asfixa por fumu esta madrugada nel momentu del ataque, según les informaciones procedentes de Benghazi, anque de primeres el responsable del Consuláu señaló que "l'embaxador en Libia y otros trés miembros del personal morrieron polos disparos de cohetes efectuaos por homes armaos contra ellos". Hores enantes, la secretaria d'Estáu norteamericana, Hillary Clinton, confirmaba la muerte d'un trabayador del Departamentu d'Estáu.

Tres esti sucesu, al que se suma otru ensin víctimes acontecíu güei na Embaxada d’El Cairu, el presidente Barack Obama ordenó reforzar la seguridá en toles embaxaes estauxunidenses del mundu, sobre manera en Libia. Pese a que se desconoz la identidá de los responsables del ataque, el vicepresidente libiu Wani al Sharif acusó a los siguidores del ex dirixente, yá fináu, Muamar Gadafi.