L’embaxador británicu nel Estáu recuerda que Londres pue refugar la independencia d’Escocia

Giles Paxman, embaxador del Reinu Xuníu nel Estáu, señaló esti martes que nel Parllamentu británicu nun esiste una mayoría favoratible a la independencia d’Alba. Ello significa qu’ésta pue refugase en Londres nel casu d’un sí.
 
"Si hubiera independencia d'Escocia, puedo dici-yos que los partíos políticos del Reinu Xuníu tán xuníos en contra y que nun hai mayoría pa la dixebra n'Escocia nesti momentu", señaló nun almuerzu informativu entamáu pola entidá Executive Fórum España nun hotel de Madrid. El primer ministru, David Cameron, declaróse hai poco favoratible a entamar un referéndum n’Alba pa resolver pronto’l futuru del país, anque les declaraciones de Paxman dexen ver que’l procesu d’autodetermín escocés nun va ser cenciellu al poder frenase dende Londres.
 
Paxman tamién indicó que'l Gobiernu británicu entamó consultes con Inglaterra y Gales pa conocer la so opinión na materia. Por último, l'embaxador reconoció "honestamente" desconocer qué "impautu" podría tener el referéndum d'Alba nun Estáu como l’español, con partíos con representación parllamentaria qu'apuesten pola independencia de territorios como Euskadi o Catalunya.