L’Axencia Asturiana de Cooperación reclama a Jiménez que defenda a los activistes propalestinos

|

L’Axencia Asturiana de Cooperación al Desarrollu esixe a la ministra d’Asuntos Esteriores, Trinidad Jiménez, que defenda los derechos de los tripulantes del ‘Gernika’ ante'l Gobiernu griegu. El barcu continúa reteníu nel cai de Kolymbari.
 
Esti organismu criticó la prohibición de Grecia de dexar partir dende los sos puertos a cualquier barcu “con ruta que tenga por destín la Franxa de Gaza” y tachó esta decisión de “inalmitible” al suponer “una violación flagrante del derechu internacional y de les normes europees de llibre circulación”. Amás, acusa al presidente del Gobiernu estatal, José Luis Rodríguez Zapatero, de ser “cómpliz” d’una midida unillateral “impuesta por un estáu sobre'l restu de los países miembros de la Xunión Europea”. “L'Executivu español nun pue permanecer impasible ante esta situación, máxime cuando hai ciudadanos españoles y asturianos damnificaos”, alvirtió.
 
Pa terminar, l’Axencia tresllada “el so apoyu plenu” a la iniciativa solidaria Rumbo a Gaza “que trata de facer una misión humanitaria pa romper el bloquéu ilexítimu que'l Gobiernu israelín vien imponiendo sistemáticamente contra'l pueblu palestín”. Otra manera, los cooperantes que tomaron de forma pacífica la Embaxada del Estáu español n’Atenes continúen dientro l’edificiu. En total, son una decena de persones, ente les que tán los asturianos Rafael Palacios y Miguel San Miguel. Mantienen la postura de nun movese del llugar hasta que la ministra d’Asuntos Esteriores tome cartes nel asuntu.

Contador Estadistiques