L’ATNL critica la falta d’enfotu de Llaviana pa col asturianu

Llaviana tendrá que devolver la subvención pal serviciu de normalización llingüística al tar ésti ensin funcionar dende xineru. L’asociación qu’axunta a los trabayadores de los SNL llamenta la falta d’enfotu del conceyu pa col asturianu.

“El Conceyu de Llaviana tien el SNL peslláu dende xineru d’esti añu, cola desconsideración que conlleva hacia’l trabayu fechu ya interrumpíu y hacia la consecución de los oxetivos a cumplir”, denuncia l’Asociación de Trabayadores de Normalización Llingüística (ATNL). Esto asocede pese a que’l Gobiernu tien concedía la subvención al ayuntamientu llavianés, cantidá qu’ingresó nel mes de mayu y qu’agora podría tener que devolver. La convocatoria pa la plaza del Serviciu de Normalización Llingüística (SNL) –el contratu al trabayador del serviciu siempre ye d’un añu– fíxose n’agostu, pero anguaño tovía nun salieron les llistes definitives de concursantes, nin el tribunal, nin les feches. “Esta situación traerá como consecuencia bien triste la devolución de perres por culpa la dexadez del conceyu, qu’una vez más demuestra la falta d’enfotu nel llabor que se vien faciendo, reflexada na interrupción de les xeres entamaes y na non proyeición nun futuru, lo que supón un pasu atrás na normalización del asturianu”, llamenten los trabayadores de los SNL asturianos.

“Dende l’ATNL esiximos que s’abra la Oficina de Normalización Llingüística de Llaviana nunes condiciones dignes que garanticen la continuidá del llabor que se realiza y que dende la Direición Xeneral de Política Llingüística busquen la manera d’establecer compromisos serios colos conceyos que faigan que la normalización social del asturianu y el gallego-asturiano seya un procesu activu, continuu y de rigor cola llei d’usu aprobada pol propiu Principáu”, reclamen.