L’asturianu va tener un güecu nesta edición de la ‘Semana Negra’

L’Asociación Cultural L’Arribada entama nesta ‘Semana Negra’ un actu dedicáu a la novela negro en llingua asturiana. Nél van participar los autores Roberto González-Quevedo, Vicente García Oliva y Xuan Xosé Sánchez Vicente.
 
A falta de confirmar día y hora, la ‘Semana Negra’, eventu que nunca nun miró muncho pa la llingua del país, va acoyer esti actu qu’axunta a trés grandes escritores del Surdimientu que tocaron la temática de la novela negro. Asina, González Quevedo espublizó nesti 2012 ‘Sangre na braña’, historia d’intriga que naz con un asesinatu nuna braña de Palacios del Sil; García Oliva escribió ‘L’aire de les castañes’ (1989, reeditada nel 2008), que recueye la investigación de la muerte de Piñerina; y Sánchez Vicente, ‘La muerte amiya de nueche’ (1983, reeditada nel 2011), que cuenta cómo los personaxes Oscar Abel Piñera y El Meruca dan los pasos pa descubrir a un asesín al mesmu tiempu que l’autor fai un esámen del papel de les instituciones polítiques.
 
L’escritor y xestor cultural, Humberto Gonzali, va ser el moderador d’esti espaciu pa la llingua asturiana dientro del festival más importante dedicáu a la novela negro, como amuesa la participación de 100 escritores procedentes de dellos puntos del planeta. La ‘Semana Negra’, que cumple 25 años de vida, va celebrase nesta ocasión nos terrenos de los astilleros desaniciaos de Naval Xixón ente’l 6 y el 14 de xunetu.