L’asturianu va tar presente en Barcelona pa la fiesta de Sant Jordi

Seis editoriales asturianes van participar na fiesta del llibru y la rosa de Sant Jordi que se celebra en Barcelona tolos 23 d’abril. La llingua asturiana va tar presente per primer vegada nesta cita llibrera de repercusión grande en Catalunya.

El Centru Asturianu de Barcelona y Ediciones Seronda promovieron la iniciativa d’instalar un puestu con llibros asturianos en Sant Jordi, proyeutu al que tamién se sumaron Pintar-Pintar, Ediciones Trea, Satori Ediciones, Hoja de Lata Editorial y Oreja Verde. D’esta forma, nel stand asturianu, que se va asitiar mañana nel númberu 35 del Passeig de Gràcia, el públicu barcelonés va atopar 35 títulos n’asturianu y castellanu, amás d'en catalán gracies a les tornes feches a esti idioma pola editorial uviedina Pintar-Pintar. L’horariu d’apertura del puestu va ser de 9 y 20 hores. 

Ediciones Seronda va encargase de llevar la producción en llingua asturiana a Barcelona. En concreto, va mostrar a los aficionaos catalanes a la llectura el poemariu billingüe ‘El paseú-El peseo’, de Miguel Rojo, y ‘Un país llamáu Dixebra’, de Francisco Álvarez, un repás a la historia d’esta banda asturiana con siguidores en Catalunya al traviés de les lletres de los sos cantares.