L’asturianu Alberto Arce presenta un documental sobre Afganistán

El documentalista asturianu Alberto Arce vuelve a presentar un documental sobre la situación de países en conflicto. Nesta ocasión, Arce treslladóse a Afganistán pa filmar una obra sobre la realidá afgana tres décades de guerra.

“Vida diaria en Kabul” ye’l nome del nuevu documental del asturianu Alberto Arce. Testigu directu de los bombardeos en Gaza de finales de 2008, Arce reflexó esos fechos nel so primer documental “To Shoot an Elephant”. Tamién estrenó esti añu “Irak: posguerra”, onde percorre Irak en 30 díes recoyiendo estremaos testimonios.

Agora vien de presentar “Vida diaria en Kabul”. Col patrociniu de Institut Catalá Internacional Per la Pau, Arce recoyió testimios n’Afganistán, un estáu en conflicto que dende va décades sobrevive ente la guerra civil y la intervención estranxera.

“Contribuyir a un acercamientu pausáu, dende embaxo y ensin obligaciones nin deudes de la realidá afgana pue ayudar, siquier, a que'l públicu integre argumentos apegaos a la realidá sobre'l terrén y non a intereses económicos o empresariales nin a propagandes gubernamentales”, señala Arce sobre’l oxetivu de “Vida diaria en Kabul”.

De baldre n’Internet
Los nueve reportaxes que formen esta obra puen vese llibremente al traviés d’Internet, nel mediu Periodismo Humano. Creative Commons ye la llicencia por la que’l autor apostó porque, como argumenta, “la cultura y la información defiéndense compartiéndola”.

Una fonda reflexón sobre Afganistán ye lo que trai esti documentalista asturianu que, al traviés del so viaxe en xunu de 2010 a esi país, aportó a la conclusión de que la estratexa pa construyir la paz  ye “que los afganos falen ente ellos. Ensin llendes. Ensin condiciones previes. A ser posible, ensin intervención estranxera”.