L’asturianismu da respuesta a la violencia de xéneru

El 25 de payares ye’l Día Internacional contra la Violencia de Xéneru. Una fecha del calendariu nel qu’instituciones y entidaes sociales amuesen la so refuga a esta llacra social. L’asturianismu tamién tien daqué que dicir nesti sen.

Son 108 les muyeres asesinaes nel Estáu español a lo llargo d’esti 2010 por mor de la violencia de xéneru. Esta cifra, lloñe d’anunciar progresos, fai remontase a la esperiencia de 2008; dómina na que la violencia sexista acabó cola vida de 113 muyeres en too l’Estáu.

El terrorismu de xéneru ye daqué qu’afecta internacionalmente, manifestándose como la consecuencia más violenta d’un sistema social desigual ente’l home y la muyer. N’Asturies, tamién hai tolos años víctimes d’estes agresiones sexistes. Ente les mortales, son cinco les muyeres asesinaes mientres el 2010, según datos oficiales.

Del 25 al 28 de payares, instituciones públiques y colectivos sociales van empobinar actos pa denunciar esta llacra social. ASTURIES.COM quiso conocer les posiciones que manifiesta l’asturianismu con esti tema y les sos propuestes p’acabar col feminicidiu.

Independencia económica y educación
“La meyor estratexa contra la violencia de xéneru ye una bona educación y un futuru dignu pa la so población”, resume Paloma García, militante de Darréu, sobre una visión compartida por toles organizaciones. Nesta llínia, María Antonia Antón, Secretaria d’Igualdá y Muyer na Executiva Nacional del PAS, alvierte que “daqué ta fallando na educación, porque sigue habiendo munchu machismu nes xeneraciones moces”.

Faustino Zapico, portavoz d’Unidá Nacionalista Asturiana, añade tamién la importancia de la “visualización de la muyer con un rol independiente y la conciliación de la vida familiar y llaboral”. La paridá nos órganos de decisión públicos y privaos y la prestación de servicios públicos calidables, son dalgunes de les sos propuestes pa evitar que los llabores familiares sigan cayendo mayoritariamente penriba de la muyer.

Pa Nuria Rodríguez, del Bloque por Asturies, toes estes propuestes tienen que dar pasu a “nueves visiones lexislatives, sociales y multidimensionales”. Amás, Rodríguez considera fundamental el trabayu de base, dar mayor protagonismu a les organizaciones feministes d’Asturies y trabayar nel ámbitu educativu, sanitariu, xurídicu y social.

Polítiques dende'l raigañu
“La bona voluntá de les polítiques contra la violencia de xéneru nun ye suficiente pa frenar esta barbarie”, comenta Mª Antonia Antón, defensora de más apoyu a les víctimes y de mayor persecución al maltratador.

Pa Paloma García les polítiques asturianes y españoles deberíen empobinase hacia’l tarrén llaboral. “La tasa de paru de les muyeres ye superior a la media masculina, sufrimos una discriminación salarial pol mesmu puestu de trabayu y mayor precariedá llaboral”, exemplifica García en pilancos que los gobiernos nun combaten eficazmente.

“Nun se trabaya abondo la base del problema, que ye'l machismu existente na sociedá”, señala Zapico nuna afirmación compartida pol BA. Nesti sen, Nuria Rodríguez diz que les polítiques fueron eficaces “na concienciación de la violencia machista como mal social”, pero concreta que son escasamente efectives n’acabar coles causes del maltratu. “Ye chocante qu’a les muyeres que denuncien nun se-yos acompaña con programes educativos qu’espliquen en qué consisten les rellaciones igualitaries”, indica Rodríguez.

Movilizándose contra la violencia de xéneru
Coles sos propuestes, denuncies y acciones, les organizaciones asturianistes amuesen el so compromisu claru contra la violencia de xéneru. Amás, faenlo cuntando con un porcentaxe escasu de militancia femenina que nun pasa del 35% nel meyor de los casos

Bloque por Asturies y UNA van participar en toles movilizaciones d’esta selmana contra la violencia de xéneru. El PAS nun va sumase como organización y Darréu sofita toles convocatories. Amás, UNA quier aportar daqué más nesi sen al traviés d’un actu propiu’l domingu a les 12.00 nel que, poniendo cinco roses al pie de la estatua de la má del emigrante, van facer alcordanza de les cinco muyeres asesinaes n’Asturies.

Mañana’l calendariu nun marcará’l Día Internacional contra la Violencia de Xéneru y, desgraciadamente, el 25 de payares de 2011 volverán les palabres y los actos pa recordar a les milenta muyeres que muerren cada añu nel mundu víctimes de la violencia sexista.

Son necesarios más pasos, acabar con contradicciones y combatir el problema dende’l raigañu. Les palabres de Paloma García, resumen ún de los oxetivos pa que too esto nun quede n’ermu: “si de verdá queremos camudar les coses, un cambiu nesta sociedá machista; nun hai qu’escaecer que tolos díes son iguales p’una muyer dende que naz y debemos entender cada día como ún de movilización”.