L’Arribada acueye la presentación del doblaxe al asturianu del llargumetraxe ‘McLintock’

|
L’Arribada, dientro de la estaya ‘Rolda’, estrena esti vienres el doblaxe al asturianu del llargumetraxe ‘McLintock’. Obra de Gonzali Producciones, un total de 30 persones trabayaron na versión asturiana d’esti clásicu del ‘western’.
 
L’estudiu Fase Cuatro de Xixón foi’l llugar onde se fixo’l doblaxe y l’acabáu téunicu d’esta película que se convierte nel tercer trabayu de Gonzali Producciones tres ‘Los viaxes de Gulliver’ y ‘El tercer home’. ‘McLintock’ –de nome ‘McLintock!’ na so versión orixinal– trátase d’un film rodáu nel 1963 baxo la direición de Andrew W. McLagen y protagonizáu por John Wayne y Maureen O’Hara, con guión basáu de manera parcial na obra de Shakespeare ‘The Taming of the Shrew’.
 
La cinta, un ‘western’ cómicu, fala de la historia d’un terrateniente machista d’Arizona abandonáu pola so muyer por sospeches d’infidelidá que vuelve a atopar a lo so ex esposa años depués en casa d’una fía común tres conocer que ta prometida con un mozu. Ello provocará engarradielles ente ellos y una bona riestra de situaciones divertíes. Los encargaos de poner voz a los personaxes de ‘McLintock’, dirixíos pol actor y direutor escénicu Antón Caamaño, foron el propiu Caamaño (John Wayne), Mayra Fernández (voz de Maureen O’Hara), Carlos Alba, Fernando Marrot ‘Win’, Inma Rodríguez, Rodrigo Alba, Fernando de Luxán, Eladio Sánchez, Norberto Sánchez, Arantxa Fernández, Armando Felgueroso, Alberto Álvarez Peña, Carlos González, Hugo Costa y Jessica M. de la Paz, ente otros.
 
La proyeición de la película va tener llugar güei a les 19 hores nel salón d’actos del Centru de Cultura Antigüu Institutu. Enantes, a les 18 hores, va presentase’l llibru ‘La puerta torcida’, d’Antón Riesgo, actu nel que van participar l’autor y Xosé Nel Riesgo.
Contador Estadistiques