L’ALLA tresllada a la FSA-PSOE’l so esmolecimientu pola actitú de Movilla pa col asturianu

L’actitú de César Movilla, alcalde socialista de Noreña, pa col idioma llevó a l’ALLA a treslladar a la FSA-PSOE “la so más fonda preocupación y perplexidá”. El primer edil negó l’usu d’un llocal municipal a un coleutivu por solicitalo n’asturianu.

Según espliquen nun comunicáu, l’Academia de la Llingua Asturiana (ALLA) “vien siguiendo con esmolición los continuos casos de discriminación llingüística que tán sufriendo los ciudadanos del Conceyu de Noreña a lo llargo d’estos años pola actitú del so alcalde, D. César Movilla, pa col usu de la  llingua asturiana na vida diaria del conceyu”. L’últimu foi la negativa al Coleutivu de Paraos/es y Precarios/es Siero-Noreña de ceder un llocal municipal pa la celebración de los sos conceyos selmanales por solicitalo n’asturianu, aconseyando al so representante, Mariu Arbesú, a facelo en castellanu pa disponer del citáu espaciu. “En relación a su escrito de fecha 13/12/13, deberá ser redactado en castellano, lengua oficial de esta Comunidad Autónoma” foi la contestación breve que recibió Arbesú nuna carta firmada por Movilla con fecha del 26 d’avientu. Por esti motivu, los paraos y precarios de Noreña y Siero, que presentaron ayeri’l so proyeutu, decidieron llevar les sos reuniones a El Berrón.

Esta postura del alcalde de Noreña ye pa l’ALLA “una falta de respetu hacia la llingua y la cultura asturiana –ya inda más, hacia’l propiu derechu de los ciudadanos del conceyu a usar la llingua d’Asturies–”. Amás, critica’l desconocimientu por parte de Movilla del “marcu  xurídicu qu’ampara’l derechu de los ciudadanos al llibre usu de la llingua asturiana”. Dada la gravedá de la situación, l'Academia decidió treslladar a la FSA-PSOE “la so más fonda preocupación y perplexidá énte esti nuevu atropellu a la llingua asturiana” y encamentó a esta formación “a poner igua a una actuación que, con toa xusticia, podría calificase de pre-constitucional y antiestatutaria”.

Ésta nun ye la primer vegada que la institución presidida por Ana María Cano amuesa la so indignación pola actitú de Movilla. N’agostu del 2011, tres el refugu del alcalde d'una moción de Conceyu Abiertu por Noreña sobre la ponte ferroviaria de Rebalde por tar escrita n’asturianu, asoleyó un comunicáu nel que llamentaba y condenaba la marxinación al idioma por parte del primer edil, y nel que tamién solicitaba al Gobiernu, naquel tiempu en manes de Foro, que liderara un procesu de reconocimientu xurídicu del asturianu.