L’ALLA esixe a Paradores l’usu del topónimu oficial Courias

Tres la denuncia pública de la XDLA del usu por parte de Paradores del topónimu castellanu ‘Corias’ en cuenta del oficial Courias, l’ALLA esixe a la so presidenta una rectificación. La inauguración del establecimientu va ser el 15 de xunetu.

L’Academia de la Llingua Asturiana (ALLA) empobínase a Ángeles Alarcó Canosa, presidenta de Paradores de Turismo de España, col envís de que se cumplan “les lleis que cinquen al usu de la Toponimia n’Asturies, esto ye, la Llei 1/1998 de 23 de marzu d’Usu y Promoción del asturianu, el decretu 98/2002 de 18 de xunetu pel que s’afita’l procedimientu de recuperación y fixación de la toponimia asturiana y el decretu 89/2008 de 3 de setiembre pel que se determinen los topónimos oficiales del Conceyu de Cangas del Narcea”. La institución académica afirma que sigue “con preocupación” les noticies relatives a la denominación del nuevu Parador de Courias, nel monasteriu de la población canguesa, y reclama’l cumplimientu de la llegalidá vixente. Al respeuto, tampoco nun se vien respetando la toponimia oficial nel establecimientu de la empresa d’orixe públicu en Xixón.

La inauguración del Parador de Courias va tener llugar el 15 de xunetu, actu pal que ta convidada Sofía de Grecia, reina d’España. D’esta forma, Paradores fai coincidir la inauguración coles fiestes del Carme que se celebren en Cangas del Narcea.