L’ALLA encamienta a la Xunta Eleutoral que corrixa la situación d’anormalidá pa col asturianu

16 Payares, 2011 por Pablo R. Guardado

Inicie sesión o rexístrese pa espublizar comentarios

El casu nuevu de discriminación a la llingua asturiana por parte de la Xunta Eleutoral llevó a l’Academia de la Llingua Asturiana (ALLA) a emitir un comunicáu. Nél encamienta al órganu que corrixa la situación d’anormalidá pa col asturianu.

“L’Academia de la Llingua Asturiana, enterada de los problemes xurdíos col emplegu del asturianu per parte d’aquellos ciudadanos asturianos que quieran exercer el so derechu al votu emplegando esta llingua, problemes que vienen siendo denunciaos pol grupu políticu Andecha Astur, quier treslladar a la opinión pública asturiana y española’l so más fondu rechazu énte les actitúes discriminatories que de contino vien sufriendo l’idioma de los asturianos en cada ocasión en qu’ésti quier ser usáu en situaciones d’especial relevancia política y alministrativa”, esplica la institución académica.

Nel comunicáu, l’ALLA tamién fai alcordanza de que situaciones como éstes sedríen impensables nuna situación d’oficialidá, polo que pide “a la Xunta Xeneral del Principáu y a les fuerces polítiques que nella s’alluguen que, d’una vegada, s’apauten p’algamar un estatus definitivu d’oficialización del nuesu vieyu idioma”.

Comentarios

Pelayu Coloráu wrote on 17 Payares, 2011:

L´ALLA y los medios de comunicación dixitales n´asturianu táis cometiendo un error bultable al da-y cobertura y espaciu de propaganda gratis a un grupúsculu que ta utilizando a tol mundín asturianista nel so provechu. Esi grupúsculu, que nun llega a partíu, de nun ser como pura ficción xurídica, ye un grupu familiar que ta faciendo munchu dañu al nacionalismu asturianu y que torgó pa munchos años toa posibilidá d´espoxigue d´un Partíu Nacionalista Asturianu que ponga a la Llingua nel camín de la Oficialidá y del respetu , del prestixu y del consensu xeneral. Baxo milenta nomes (Conceyu Abiertu, Andecha, CUPX, N´Ast, Espublizastur, Democracy for Asturies, etc.) ta de contino faciendo creer a los neños qu´ellos son la cañamina d´un "Movimientu de Lliberación Nacional" qu´un día pue espolletar, y la cruda realidá ye que ye too un cuentu: un señor que, por intereses personales, xunto a familia ya incondicionales (seis persones más o menos) remana cuarenta blogs y cuarentamil iniciatives que nun son más que fumo y espluma. El movimientu asturianista real fadría perbién en alloñase d´esta xente, dexalos solos na so espiral de lloria y ponelos nun cordón sanitariu, a la espera de que muerran políticamente colos sos cien o doscientos votos y en cayida. Facemos un flacu serviciu a la Llingua y al so prestixu dexando la pelleya por esti montaxe victimista, pseudonacionaliegu y obediente a dictaos sacaos direutamente de la FSA según dellos indicios.