L’ALLA celebra en Cangas un actu previu a la Selmana de les Lletres

Col nome de ‘Día de las Ḷḷetras Asturianas’, l’ALLA entama esti vienres un actu en Cangas del Narcea en collaboración col Conceyu. Nel mesmu va presentase’l llibru ‘Vocabulariu de Cangas del Narcea’, de Jesús Feito Calzón.

Esta celebración tien el so orixe nel pidimientu fechu en setiembre n’Uviéu pol alcalde de Cangas, José Luis Fontaniella, mientres l’actu d’entrega de los diplomes a los participantes na Universidá Asturiana de Branu (UABRA), de celebrar el Día de les Lletres Asturianes nel conceyu cangués. L'Academia de la Llingua Asturiana (ALLA) entiende que la cita que tien llugar tolos años el primer vienres de mayu nun se pue mover d’Uviéu, pero, daes les bones rellaciones ente l’Ayuntamientu de Cangas y la institución académica, promovióse l’entamu del ‘Día de las Ḷḷetras Asturianas’ como adelantu a la Selmana de les Lletres.

El Teatru Torenu ye’l llugar escoyíu p’acoyer esta actividá, que var tar presentada pola actriz María Cotiello. Nél va presentase’l llibru ‘Vocabulariu de Cangas del Narcea’, de Jesús Feito Calzón’, pa depués dar pasu a una intervención d’Ana María Cano, presidenta de l’ALLA. Cotiello tamién va lleer una esbilla de poemes, pa finar l’actu cola representación de ‘Llázaro de Tormes’ a cargu de Carlos Alba ‘Cellero’. L’eventu va principiar a les 19.30 hores.