L’alcalde de Noreña escúdase nel usu del asturianu pa torgar a Conceyu Abiertu l’accesu a información

César Movilla, alcalde socialista de Noreña, protagoniza un despreciu nuevu a la llingua asturiana. Niega tramitar dos pidimientos de documentación de Conceyu Abiertu por tar n’asturianu como escusa pa torgar l’accesu a la información.

“Trátase en dambos casos de testos cenciellos nos que se pide documentación. El día 17, un llistáu con documentación  en xeneral de dellos temes  (ponte del Rebalde, actes de plenos celebraos, les normes subsidiaries que sostituyen al PXOU, los presupuestos del 2012, el borrador de los del 2013...)”, mentes que’l 21 l’edil Pablo Pérez solicitó “una copia de los antecedentes de les comisiones celebraes güei xueves –por ayeri–, día nel que se nos estrega una carta de contestación onde l’alcalde comunica que ‘previo a su tramitación deberá presentarlos en lengua castellana’”. Conceyu Abiertu por Noreña entiende con esti pretestu que, amás d’amosar un despreciu nuevu pal idioma del país, Movilla pretende “torgar un normal accesu a la información, como venimos denunciando tolos grupos de la oposición dende l’aniciu de la llexislatura”.

“Queda claro que nesta ocasión axúntense dos de les ‘polítiques estrella’ d’esti mandatu de Movilla: torgar tolo posible’l llabor de los conceyales de la oposición y la represión constante al derechu a utilizar l’asturianu. La Noreña de Movilla tien una perbaxa calidá democrática”, afirmen los nacionalistes, que faen denuncia pública del incumplimientu que realiza’l PSOE del so programa eleutoral, yá que nel puntu 63 del mesmu “comprométense colos vecinos y vecines a ‘Potenciar la normalización social del asturiano’”. “Quixéremos saber qu’entiende’l PSOE y Movilla por normalizar l’asturianu; podrían empezar por dexar utilizalo…”, entrúgense dende la formación, qu’alerta de que’l gobiernu municipal entovía nun pidió les subvenciones al Gobiernu pa la normalización del idioma nin incorporó una partida nel presupuestu pa ello. Otra manera, dende Conceyu Abiertu por Noreña demanden al restu de fuercies con representación una midida qu’impida a Movilla repetir estos desprecios a la llingua asturiana.

Coordinadora Nacional

El sábadu pasáu, Conceyu Abiertu celebró en Noreña la so Coordinadora Nacional, órganu asambleariu de la formación, de periodicidá mensual, nel que participen tolos conceyos que conformen el proyeutu, asina como toles persones que quieran acudir a títulu individual pal alderique y la toma de decisiones sobre delles cuestiones. Nél decidióse dar continuidá a la campaña contra’l fracking o resquiebra hidráulico que la plataforma d’eleutores entamó hai unes selmanes, qu’inclúi la defensa d’una moción nel Plenu municipal de Noreña pa oponese a esta práutica, y l’aniciu d’otra de defensa de los conceyos asturianos. Asina, respeuto a esta última, Conceyu Abiertu va facer público nos díes próximos un posicionamientu políticu y va distribuyir pegadielles col lema ‘Cada conceyu ye importante. Defendamos los conceyos asturianos. Asturies pola democracia participativa’.