L’adelantu de les eleiciones obliga a Bloque y UNA a paralizar la iniciativa ‘Xente con compromisu’

Bloque y UNA, enfotaos na puesta en marcha d’una plataforma p’axuntar l’asturianismu, vense obligaos a paralizar temporalmente esti procesu por mor de les eleiciones nacionales anticipaes. Éstes van tener llugar el 25 de marzu.

La iniciativa ‘Xente con compromisu’, anunciada en La Pola Ḷḷena’l Día d’Asturies pasáu por representantes del Bloque por Asturies y Unidá Nacionalista Asturiana (UNA), diba presentase de manera oficial a lo llargo del mes de febreru, pero la convocatoria revelada ayeri por Francisco Álvarez-Cascos obliga a les formaciones impulsores d’esta plataforma a paralizar el proyeutu de manera temporal. Asina, nes reuniones previstes esta selmana –el xueves, el Bloque tien xunta nacional, y el sábadu UNA celebra un conceyu– les dos organizaciones van analizar de manera detallada la situación actual pa tomar decisiones de cara a la cita coles urnes del 25 de marzu. Too paez indicar que Bloque-UNA repetirán candidatura nestes eleiciones nacionales anticipaes tres sumar 6.160 votos (1,03 por cientu) en mayu, anque tovía nun hai nada confirmao.

Consultaos sobre la situación nueva na que s’alcuentra’l país tres los acontecimientos últimos, los voceros de los dos partíos, Manuel Benayas y Yolanda Huergo, coincidieron nes crítiques a les formaciones parllamentaries “pola situación tan crítica na que dexen a Asturies”. El de Samartín del Rei Aurelio llamenta “l’aislamientu de tolos partíos al sentir de la xente” y considera que la convocatoria d’eleiciones “nun ye la solución al problema”. “Toos tienen una responsabilidá compartida”, continúa Benayas, los representates del Gobiernu “porque nun supieron gobernar” y la oposición porque nun lo permitió a la espera de poder sacar tayada. Mentes, Huego cataloga de “mala noticia” l’anunciu d’Álvarez-Cascos porque “significa que vamos tar un añu ensin Gobiernu por culpa d’intereses partidistes, lo que ye mui malo nun contestu de crisis económica como nel que tamos”.

La vocera d’UNA reconoz que la celebración d’eleiciones en namái 54 díes “nun nos pilla nun bon momentu, yá que tamos inmersos nun procesu de confluencia col Bloque” que va tener que quedar paráu “porque tenemos que priorizar y concurrir a les eleiciones pa llueu continuar nel camín que queremos aniciar”, en referencia a la iniciatica ‘Xente con compromisu’. Sobre la posibilidá d’algamar bonos resultaos eleutorales, Benayas opina que “el marcu nun ye’l meyor”, anque considera que Bloque-UNA podría ser una “ferramienta válida” p’aquelles persones que tean na disyuntiva “ente aquellos partíos que miren polos sos intereses propios y aquellos que permanecen xunto a la xente y los sectores más desfavorecíos”.

Na semeya, un momentu del actu pol Día d'Asturies celebráu pol Bloque por Asturies y UNA nel 2011 en La Pola Ḷḷena.