L’acampada d’indignaos d’Avilés va llevantase esti miércoles

A les 18 hores d’esti miércoles ta previsto’l llevantamientu de l’acampada d’indignaos que lleva selmanes instalada na plaza de la Casa Conceyu d’Avilés. N’Uviéu tienen decidío dexala’l domingu, mentes qu'en Xixón podría terminar esti xueves.
 
D’esta forma, los indignaos asturianos pasen a una fase nueva d’esti movimiento qu’anició’l 15 de mayu pasáu en tol Estáu con una manifestación convocada peles redes sociales pola plataforma ‘Democracia real yá’ y que va continuar con asamblees periódiques y con trabayu nos barrios. El final de l’acampada d’Avilés ta previsto a les 18 hores d’esta tarde, mentes que la d’Escandalera va terminase’l domingu a les 17 hores con una xornada de micrófonu abiertu y alcuentros con asociaciones y movimientos sociales.
 
No que respeuta a Xixón, tovía nun hai una decisión tomada, anque lo que sí tienen previsto los indignaos xixoneses ye dexar espaciu al Mercáu Ecolóxicu y Artesanu previsto pa esta fin de selmana. Sicasí, el movimientu continúa coles actividaes diaries na Plaza Mayor y ye posible que’l llunes sigan con elles. Lo que sí yá ta dáu ye’l saltu a los barrios. El llunes pasáu, celebróse la primer asamblea n’El Llano.
 
Otra manera, les acampaes de Mieres y Llangréu yá dexaron la so actividá’l vienres y ayeri, de forma respeutiva.