L’Academia de la Llingua asoleya un nuevu númberu de la revista “Cultures”

El númberu 14 de la revista asturiana de cultura qu'asoleya l'Academia de la Llingua yá ta na cai. Nesta entrega, que nun ye volume especial y polo tanto nun ta dedicada a tratar específicamente a nengún tema concretu, como nos númberos dedicaos a la cultura del pan o la de la sidra -anterior númberu 13- puen alcontrase artículos de temes bien variaos.

L'Académicu James Fernández McClintock abre esti númberu de "cultures" con un analís que, baxo'l títulu "la enfermedá del llinguaxe y el llinguaxe de la enfermedá" afonda na dinámica de creación de los llugares comunes y les categoríes nel llinguaxe dende'l puntu de vista de l'antropoloxía y la moralidá. L'antropólogu Roberto Álvarez - Quevedo pela so parte, fai en "símbolos de sangre" un estudiu sobre los mitos y simbolismos qu'arrodien el fenómenu de la regla femenina, mientres que Joaquín Fernández García, Rodrigo Fernández Alonso y Esther González analicen el tratamientu de les infecciones y enfermedaes infeccioses na melecina popular asturiana. Nel terrén de la lliteratura, Vicente García Oliva establez nel artículu qu'escribió pa esti númberu de "cultures" les posibles pontes ente la tradición y la lliteratura de la xeneración del Surdimientu, pesllando'l volume con un estudiu d'Alberto Álvarez Peña sobre los resclavos de ritos iniciáticos que se xorrasque nun cuentu de llobos.