Kyoto fabrica yelsu

Según espliquen Ecoloxistes n'Acción, la empresa Mina de la Camocha tien intención d'abrir una cantera en conceyu Siero empobinada a la producción de yelsu. El grupu conservacionista ve ensin xacíu la propuesta de la empresa minera en cuantes que los proyectos de desulfuración de gases en Centrales Térmiques que manda entamar la normativa mediuambiental derivada del protocolu de Kyoto pue convertir los restos contaminantes de los grupos térmicos a carbón en fontes de materia prima pa yelsu.

La normativa sobre Grandes Instalaciones de Combustión y sobre la Prevención y Control integráu de la Contaminación obliguen a entamar procesos de desulfuración consistentes n'aplicar caliza a los restos contaminantes de les centrales térmiques a carbón, resultando de tola química del procesu yelsu como resultáu final. Según les cuentes qu'echen n'Ecoloxistes n'Aición, anque nun se desulfuraren toles chimenees de grupos térmicos esistentes anguaño n'Asturies, triplicaríense tranquilamente les 50.000 tonelaes de yelsu que se producíen n'Asturies a primeros de la década de los 90. Ello ye que pa convertir 65.000 tonelaes d'óxidos d'azufre -les centrales asturianes vierten al añu más de 75.000 tonelaes al añu d'esti contaminante- ye preciso aplicar 100.000 tonelaes de caliza -el 1% de la producción de les nuestres canteres- saliendo como resultante del procesu un total de 150.000 tonelaes de yelsu artificial.

Según apunten dende Ecoloxistes n'Aición el yelsu procedente d'estos procesos de desulfuración, que van ser obligatorios en tol estáu, pue producir un cambéu radical na situación de la industria cementera. España, con ser el segundu estáu del mundu en producción de cementu tres de los EEUU, ye ún de los que menos apliquen procesos de desulfuración. En resulta d'ello, la industria española del cementu ye una de les que menos empleguen el"yelsu de desulfuración" como materia prima, cuando n'otros estaos esti productu ta nel 40% de la producción cementera, siendo Alemaña l'estáu onde estos procesos tan más adelantaos y onde sector eléctricu y fabricantes de cementu tan más en collaboración col oxetivu de consiguir un yelsu de desulfuración de la meyor calidá posible.

Más información na web d'Ecoloxistes n'Aición